Այսօր Սոչիում` Կրասնայա Պոլյանա լեռնադահուկային հանգստավայրում կայացած բանակցությունների ավարտին Դմիտրի Մեդվեդևը, Սերժ Սարգսյանը և Իլհամ Ալիևը համատեղ հայտարարություն են ընդունել` Լեռնային Ղարաբաղի հակամարտության կարգավորման վերաբերյալ:
Ըստ «Նովոստի» լրատվական գործակալության` փաստաթղթում ասված է, որ երեք պետությունների ղեկավարները քննարկել են 2010 թվականի հոկտեմբերի 27-ին Աստրախանում կայացած նախորդ հանդիպման ժամանակ ընդունված եռակողմ հայտարարության գործնական իրականացման հարցերը:
Մասնավորապես, նախագահները պայմանավորվել են ամենակարճ ժամկետներում ավարտել ռազմագերիների փոխանակումը:
Բացի այդ, փաստաթղթում ընդգծվում է «բոլոր վիճելի հարցերը խաղաղ միջոցներով լուծելու և հրադադարի գծի երկայնքով հնարավոր միջադեպերի` կողմերի մասնակցությամբ, ԵԱՀԿ-ի Մինսկի խմբի համանախագահների հովանու ներքո, ԵԱՀԿ-ի գործող նախագահի հատուկ ներկայացուցչի աջակցությամբ հետաքննություն անցկացնելու ձգտումը»:
«Նախագահները նշեցին Լեռնային Ղարաբաղի հակամարտության կարգավորման հարցերով իրենց կանոնավոր շփումների կարևոր նշանակությունը և պայմանավորվեցին դրանք շարունակել նույն ձևաչափով` ի լրումն ԵԱՀԿ-ի Մինսկի խմբի համանախագահների աշխատանքի», – ասված է հայտարարությունում:
Բանակցությունների պաշտոնական մասը Սոչիում մեկնարկել էր տեղական ժամանակով կեսօրից քիչ անց: Ավելի քան երեք ժամ անց հաղորդվեց, որ նախագահների շփումները շարունակվում են ոչ պաշտոնական ձևաչափով:
