Այսօր Սպարապետ Վազգեն Սարգսյանի ծննդյան օրն է: Նա կդառնար 52 տարեկան: Սպարապետի ընկեր ու զինակից Մյասնիկ Մալխասյանը բոլոր ընկերների անունից շնորհավորում է Սպարապետի ծննդյան օրը: «Ինչքան ժամանակ է անցնում, այնքան շատ ենք զգում Սպարապետի տեղը: Տեղին է ասել`ծառի բնի հաստությունը երևում է ծառը կտրելուց հետո»,- ասում է Մալխասյանը:
Նրա գնահատմամբ, եթե Սպարապետը ողջ լիներ, մենք կապրեինք այլ Հայաստանում, բանակի վիճակը բոլորովին այլ կլիներ:
«Բանակում անարդարություն է տիրում: Ամեն օր ոտնահարվում է զինվորի արժանապատվությունը: Զինվորը ինքն է փորձում արդարություն հաստատել, քանի որ չի վստահում իր սպային, ով Մարտի 1-ին դուրս եկավ փողոց, կրակեց ժողովրդի վրա»,- նշում է Սպարապետի ընկերը:
Մալխասյանը, որ ժամանակին զբաղեցնում էր Զինծառայողների սոցպաշտպանության վարչության պետի պաշտոնը, հիշում է, որ Սպարապետ Վազգեն Սարգսյանի ժամանակ հրամանատարները իրենց կյանքով էին պատասխանատու յուրաքանչյուր զինվորի համար:
Լուսանկարը` Գագիկ Շամշյանի