Երևի մինչև տարեվերջ կապանցի տաքսիստները չեն հրաժարվի ուղևորներին Կապանի ծայրամասային թաղամասերից մեկը` Կավարտ հասցնել:
Մոտ 20 տարուց ավելի է, որ այս ճանապարհը անբարեկարգ վիճակում է ու ցանկացած ընտրության ժամանակ բոլոր թեկնածուները խոստանում էին նորոգել: Այս տարվա պետբյուջեից 105 մլն դրամ է ճանապարհի նորոգման համար:
Ճանապարհի ողջ երկայնքով փոսեր են, բնակիչները այնքան են փոսերը սեփական միջոցներով լցրել ավազով, բայց դա հարցի լուծում չէ: Հատկացված գումարով սակայն հնարավորություն կլինի նորոգել ճանապարհի առավելապես վատթար վիճակում գտնվող 750 մ հատվածը, որից հետո մնացած գումարով կկատարվեն փոսային նորոգման աշխատանքներ:
Այժմյան ճանապարհի լայնությունը 8-9 մ է, սակայն հիմնանորոգման ժամանակ այն նեղացվելու է մինչև 7մ: Էլի մեղավորը ֆինանսներն են. չի հերիքում:
Հիմնանորոգման աշխատանքներին զուգահեռ` կկատարվի նաև ջրահեռացման համակարգերի նորոգում, ինչպես նաև` ճանապարհաշինության համար անհրաժեշտ բոլոր օժանդակ աշխատանքները:
Դեպի Կավարտ տանող ճանապարհին գտնվող երկու հզոր ջրընդունիչ հորերի վերակառուցումն էլ ամբողջովին կիրականացնի քաղաքապետարանը: Նախատեսված է ներդնել 2 մլն դրամ, ու մինչև ճանապարհի նորոգման աշխատանքներ սկսելը` դա պիտի ավարտվի:
Այս աշխատանքները կկատարվեն ավելի վաղ` մինչ ճանապարհի հիմնանորգման սկսվելը: Ճանապարհի հարակից մայթերը նույնպես չեն նորոգվի:
«Ճանշին նախագիծ» ՓԲԸ-ի մասնագետները արդեն ավարտել են չափումները, կատարվել են մոտավոր հաշվարկներ: Նախագիծն ու նախահաշիվը կազմելուց հետո հայտարարված մրցույթում կընտրվի հաղթող ընկերությունը: Աշխատանքերը կսկսեն եղանակաների տաքանալուց հետո:
Ամեն դեպքում նորոգումից հետո էլ Կավարտ թաղամաս տանող մոտ 7 կմ երկարության ճանապարհի 2,5 կմ-ը կլինի որակով` ասֆալտապատ, իսկ մնացածը` ոչ ասֆալտապատ, սակայն երթևեկելի: