Այս տարի ևս «Թոշակառու մանկավարժներ առանց սահմանի (GREF)» ֆրանսիական կազմակերպության 12 անդամներ՝ ֆրանսերենի նախկին ուսուցիչներ, ս.թ. մարտի 7-ից ապրիլի 17-ը, արդեն տասներեքերորդ անգամ կժամանեն Հայաստան հանրապետության ողջ տարածքում ֆրանսերենի ուսուցիչների վերապատրաստում անցկացնելու համար։
Նրանց առաքելությունը կսկսվի ս.թ. մարտի 7-ին, ժամը 10-ին Հայաստանում Ֆրանսիայի դեսպանությունում կայանալիք աշխատանքային ժողովով, այնուհետև դեսպան Անրի Ռենոյի հրավերով կկայանա ճաշ՝ հայ և ֆրանսիացի գործընկերների մասնակցությամբ։
GREF-ը գործել է Հայաստանում 1996-2000 թթ., ապա վերսկսել է իր գործունեություն 2005 թվից ոչ միայն Երևանում, այլ նաև մարզերում։ 2010 թ., Հայաստանի պետական և տեղական կառավարման մարմինների, ֆրանսիական քույր քաղաքների և Ֆրանսիայի դեսպանության շնորհիվ, Ստեփանավանի, Վանաձորի, Գյումրիի, Արթիկի, Մաստարայի, Չարենցավանի Հրազդանի, Գորիսի և Երևանի 184 ուսուցիչներ կարողացան մասնակցել GREF-ի վերապատրաստման դասընթացներին։
GREF-ը ստեղծվել է 1990 թ. և գործունեություն է ծավալում ողջ աշխարհում՝ վերապատրաստման ու զարգացման իր ծրագրերով։ ՀՀ կրթության և գիտության նախարարության և Կրթության ազգային ինստիտուտի համագործակցությամբ, GREF-ը մանկավարժական և լեզվաբանական վերապատրաստումներ է անցկացնում ոչ միայն հանրակրթական դպրոցների ուսուցիչների համար։
Բոլորովին վերջերս, մասնագիտական վարժարանների վերաբացմանը զուգընթաց, դասընթացներ են սկսվել տեխնիկական ֆրանսերենի դասավանդման բնագավառում։
