iOS օպերացիոն համակարգով iPhone, iPad եւ iPod Touch սարքերում հայտնաբերվել է սխալ, որը կապված է ձմեռային ժամանակին ճիշտ անցնելու հետ: Այս սարքերը ճիշտ փոխել են ժամը, սակայն զարթուցիչներում այդ փոփոխությունը չի կատարվել, եւ նրանք հեռախոսատերերին մեկ ժամ ուշ են արթնացրել: Այս մասին հաղորդել է Engadget՝ էլեկտրոնային սարքերի մասին գրող կայքը: Կայքը տեղեկացնում է նաեւ, որ այս մասին Apple ընկերությանը դեռ վաղուց են հայտնել, քանի որ նմանատիպ խնդիրներ առաջացել են Ավստրալիայում, որտեղ ձմեռային ժամանակին անցել են հոկտեմբերի սկզբին: Այս խնդիրը լուծելու համար Apple-ն ուներ մեկ ամիս: Սակայն խնդիրը դեռ մնացել է: ԱՄՆ-ը ձմեռային ժամանակին անցնում է նոյեմբերի սկզբին, եւ անհայտ է` արդյո՞ք Apple-ի մասնագետները կվերացնեն այդ անսարքությունը: