Այսօր Գալուստ Սահակյանը լրագրողների հետ հանդիպման ժամանակ հայտարարեց, որ Սերժ Սարգսյանը երեկ այցելել է կուսակցության գրասենյակ և հանդիպում ունեցել։ Սակայն Գալուստ Սահակյանի խոսքերով, դա չի նշանակում, որ եթե նախագահը այցելել է կուսակցության գրասենյակ, ապա պարտադիր գործադիր նիստ պետք է տեղի ունենա։
Սերժ Սարգսայնը և՛ հանրապետության նախագահն է, և՛ կուսակցության, հետևաբար, միշտ էլ այցելում է և քննարկում խնդիրները: Սակայն գործադիր նիստ՝ որպես այդպիսին, տեղի չի ունեցել, քննարկվել են ներքին և արտաքին խնդիրները:
Լրագրողների հարցին, թե իրենք քննարկե՞լ են Լևոն Տեր-Պետրոսյանի 14 կետից բաղկացած հայտարարությունները և երեկ «Ժառանգության» հետ կապված միջադեպը, Գալուստ Սահակյանը պատասխանեց, որ իր գործընկերներն արդեն հրահանգել են ծառայողական քննություն սկսել, հետևաբար պետք է ընդունել այն, ինչ ասվել է:
Գալուստ Սահակյանը կարծում է, որ բողոքի դուրս եկած մարդկանց պահանջն արդարացի է, և ասաց, որ իրենք փորձում են ծրագրերի շրջանակներում լուծում տալ խնդրին:
Լրագրողների այն դիտարկմանը, թե սա չի՞ նշանակում, որ կառավարությունը ձախողել է իր գործունեության մեջ, և արդյոք պատրա՞ստ են վարչապետին փոխել, Սահակյանը արձագանքեց. «Որևէ մեկն իր դիրքերում հավերժ չէ, այլ իր սկզբունքներով ու մտքերով է հավերժ, ուստի ՀՀ վարչապետն էլ հավերժ չէ»: