Դոնի Ռոստովում տեղի ունեցած մամուլի ասուլիսի ժամանակ Ռուսաստանի ռազմավարական հետազոտությունների ինստիտուտի տնօրեն Լեոնիդ Ռեշետնիկովը հայտարարել է, թե միանշանակ չի կարելի հայտարարել, որ Հայաստանն այսօր Ռուսաստանի կայուն գործընկերն ու դաշնակիցն է Անդրկովկասում: Այս մասին հաղորդում է Rosbalt գործակալությունը:
Նրա կարծիքով, հիմա Հայաստանում և՛ տնտեսական, և՛ սոցիալական, և՛ քաղաքական իրավիճակը շատ է բարդացել: Նա հիշեցրել է, որ Հայաստանից Ռուսաստան է տեղափոխվել այդ երկրի բնակչության մոտ կեսը, այդ թվում՝ Ռուսաստանի հանդեպ բարյացակամ տրամադրված մտավորականությունը: Եվ եթե սովորական բնակչությունը մտահոգված է Կովկասում Ռուսաստանի դիրքերի թուլացմամբ, ապա մտավորականության և պետական համակարգի ներկայացուցիչների շրջանում այլ տրամադրություններ են:
ԱՄՆ ակտիվացել է Հայաստանում, և պատահական չէ, որ նրանք այդ երկրում կառուցել են աշխարհի ամենամեծ դեսպանատունը: «Դա նշանակում է, որ Կենտրոնական հետախուզական վարչությունն այդտեղ իր տարածաշրջանային ներկայացուցչությունն ունի, և դա բոլորի համար ակնհայտ է: Դրա համար այնտեղ գործում են 300-400 աշխատակիցներ, որոնք ներկայանում են որպես ամերիկյան դիվանագետներ կամ վարչա-տեխնիկական անձնակազմ»,- ավելացրել է նա:
Ըստ Ռեշետնիկովի` ամերիկացիները փորձում են դուրս մղել այն օղակը, որը դեռ ապահովում է ռուսական ազդեցությունը Կովկասում: Այդ ուղղությամբ են նաև Հայաստանին Թուրքիայի հետ հաշտեցնելու ԱՄՆ ջանքերը: Ռեշետնիկովն ասել է, որ ինքը հանդիպումներ է ունեցել Հայաստանի բարձրագույն ղեկավարության ներկայացուցիչների հետ, որոնք նշել են, որ անհրաժեշտ է թեքել զարգացման ուղղությունը դեպի ԱՄՆ: «Ես մի բարձրաստիճան պաշտոնյայի ասացի, որ ԱՄՆ-ն գումարներ չի տա երկրի զարգացման համար: Նրանք կարող են, օրինակ, կոյուղու զարգացման համար գումար տալ, որը Հայաստանի իշխանությունների կողմից կօգտագործվի հարստացման նպատակով: Ամերիկացիները երբեք այլ գումար չեն տվել՝ բացի այսօրինակ նպատակային ծրագրերից, որպեսզի գնեն վերնախավին: Իմ զրուցակցի դեմքից երևաց, որ նա համաձայն է ԱՄՆ այդ գծի հետ, նրան դուր եկավ այդ գաղափարը, որ ամերիկացիները իշխող վերնախավին գումարներ կտան»,- ավելացրել է Ռեշետնիկովը: Նա նաև ասել է, որ ռուսական դիրքերի թուլացումը նկատելի կլինի առաջիկա մեկ-երկու տարիների ընթացքում:
Մնում է միայն ենթադրություններ անել, թե ռուսական այդ որ գումարներն են ծառայել Հայաստանի զարգացմանը կամ չեն գնացել ՀՀ իշխանավորների գրպանները: