Լոնդոնի էկոնոմիկայի դպրոցի տնօրեն Հովարդ Դևիսը երեկ ներկայացրել է հրաժարականի դիմում: Հրաժարականի պատճառ են դարձել Քադաֆի ընտանիքի հետ ունեցած հարաբերությունները: Այս մասին հաղորդում է BBC հեռուստաալիքը: «Ես պատասխանատվություն եմ կրում դպրոցի վարկի համար, որը տուժել է (Դևիսի` Լիբիայի առաջնորդի հետ ունեցած հարաբերությունների պատճառով.– 1in.am)»,- ասել է Դևիսը:
«Առաջին լրատվականը» երեկ տեղեկացրել էր, որ այդ դպրոցին մեղադրել են Քադաֆիների հետ կապի և նրանցից հանգանակություններ ստանալու համար: Բացի այդ, բոլոր լրատվամիջոցները մարտի 3-ին հայտնեցին, որ այս դպրոցում ուսանած Քադաֆիի որդի Սայֆ Ալ-Իսլամի դոկտորական աշխատանքը իրականում մասամբ արտագրված է այլ աղբյուրներից և կայքերից:
Դևիս ընդունել է, որ «սխալ է վարվել Քադաֆիներից 300 հազար ֆունտ ստերլինգ ընդունելով»: Նա նաև սխալ է համարել իր այն քայլը, երբ մեկնել է Լիբիա և տնտեսական խորհրդատվություն տվել Քադաֆիներին: Այս ամենը հաջորդել է Սայֆ Ալ-Իսլամին դոկտորական աստիճան շնորհելուն:
