Սանկտ Պետերբուրգի պետական համալսարանի միջազգային հարաբերությունների ֆակուլտետի պրոֆեսոր Ռուսլան Կոստյուկը 1news.az-ին կարծիք է հայտնել, որ ռուսական դիվանագիտությունը ջանքեր է գործադրում ակտիվացնելու ղարաբաղյան հակամարտության կարգավորման գործընթացը:
«Սոչիի հանդիպումից լավագույն դեպքում կարելի է սպասել 2009-ին մոսկովյան հռչակագրի կրկնություն, սակայն ինչպես հայտնի է, դրան ոչինչ չհետևեց: Ռուսական իշխանությունների համար կարևոր է, որ հակամարտությունը չակտիվանա, սակայն հիմնական խնդիրը` այն ավարտելն է: Բացի այդ, Բաքվի և Երևանի դիրքորոշումները ընդհանրապես չեն մոտեցել: Բոլորը ակնկալիքներ ունեին Աստանայի գագաթնաժողովից, սակայն բեկում տեղի չունեցավ, կարծում եմ` նույնը կարելի է ասել Սոչիի հանդիպման մասին»,- ասել է Կոստյուկը:
Փորձագետը չի բացառել, որ Մեդվեդև-Սարգսյան հանդիպմանը Ռուսաստանի նախագահը ճնշում գործադրած լինի Սարգսյանի վրա բանակցային գործընթացում իրական զիջումների գնալու համար: Սակայն խնդիրն այն է, որ դիվանագիտական ջանքերը գաղտնի են եղել, և հանրությունները դրանց մասին տեղեկացվել են արդեն տեղի ունենալուց հետո:
Հակամարտությանը ԱՄՆ ներգրավվածության մասին Կոստյուկը կարծիք է հայտնել, որ ներկայումս Վաշինգտոնի համար մերձավորարևելյան ուղղությունն ավելի կարևոր է, սակայն երկարատև ռազմավարության տեսանկյունից հարվկովկասյան տարածաշրջանը ևս շատ կարևոր է, իսկ ԱՄՆ կողմից հակամարտությունից ուշադրությունը հեռացնելու դեպքում իրադարձությունները կզարգանան ոչ հօգուտ հայկական կողմի: