Ռուսաստանի արտգործնախարարության ներկայացուցիչ Ալեքսանդր Լուկաշևիչը հայտարարել է, որ ղարաբաղյան հակամարտության կարգավորման բանակցությունների եռակողմ ֆորմատը հնարավորություն է տվել նվազեցնել լարվածությունը և ամրապնդել վստահության մթնոլորտը հակամարտող կողմերի միջև: Այս մասին տեղեկացնում է Trend-ը:
«Մինսկի մյուս համանախագահների աջակցությամբ Ռուսաստանը ջանքեր է գործադրում առաջընթաց արձանագրելու համար: 2010-ին Ռուսաստանի, Ադրբեջանի ու Հայաստանի նախագահների 3 հանդիպում է տեղի ունեցել: Այդ շփումները հնարավորություն են տվել ամրապնդել վստահությունը և մոտեցնել կողմերի դիրքորոշումները»,- ասել է Լուկաշևիչը:
Նրա խոսքով, աստրախանյան հանդիպմանը Հայաստանի և Ադրբեջանի նախագահները համաձայնել են շարունակել աշխատել կարգավորման հիմնական սկզբունքների վրա:
«Կարծում ենք` հաջորդ շաբաթ Սոչիում կայանալիք հանդիպմանը նախագահ Մեդվեդևը հնարավորություն կունենա վերլուծելու հանդիպումների միջև ընկած ժամանակահատվածում իրականացված աշխատանքները և կանխորոշել հետագա քայլերը, որոնք ուղղված կլինեն կողմերի համար փոխադարձաբար ընդունելի որոշման ընդունմանը»,- շեշտել է Լուկաշևիչը: