Տնտեսական անվտանգության տեսակետից որևէ վտանգ չկա նրանում, որ Հայաստանի ամենախոշոր 5 հարկատուներից 4-ը օտարերկրյա ընկերություններ են: Այս մասին 1in.am-ի հետ զրույցում ասաց տնտեսագետ Վահագն Խաչատրյանը: «Կարևորը, որ այդ մարդիկ իրենց հարկային պարտավորությունները պատշաճ կատարեն»,- նշեց տնտեսագետը: «Իհարկե, տնտեսական առումով ավելի լավ կլիներ, որ այդ խոշոր ընկերությունները գերազանցապես մի երկրի, տվյալ դեպքում` Ռուսաստանին չպատկանեին: Օրինակ՝ ոչ թե միայն Ռուսաստանը ունենար Հայաստանի էներգետիկ սեփականությանը 80%-ը, և մի ուրիշը` մեկ այլ բնագավառի սեփականության 90%-ը, այլև լավ կլիներ, որ այլ ընկերություններ էլ մասնակցություն ունենային, և այդ 80%-ի փոխարեն լիներ շատ ավելի քիչ: Որովհետև զուտ տնտեսական առումով եթե որևէ երկրում ճգնաժամային կամ իրավիճակի ինչ-որ փոփոխության խնդիր առաջացավ, ապա միանգամից դա մեր տնտեսության վրա էականորեն կազդի»,- նշեց Վ. Խաչատրյանը: Ինչ վերաբերում է քաղաքական անվտանգությանը, ապա ըստ Վ. Խաչատրյանի՝ այստեղ խնդիրներ կարող են առաջանալ: «Որևէ մի երկիր կարող է իր անդրազգային ընկերությունների միջոցով մեր իշխանությունների վրա ազդելով փորձել Հայաստանում իր քաղաքական ծրագրերն իրականացնել: Այսօր անդրազգային կորպորացիաները տարածված են աշխարհում, և խնդիրն այն է, որ բոլորն էլ ցանկություն ունեն տվյալ երկրի քաղաքական կյանքին ինչ-որ ձևով մասնակցություն ունենալ: Առավել ևս Հայաստանի նման երկրի պարագայում, որտեղ կախվածությունը Ռուսաստանից քաղաքական առումով չափազանց մեծ է: Բայց այս խնդիրը վերաբերում է ոչ միայն Հայաստանին, այլև մյուս երկրներին, որտեղ կան անդրազգային կորպորացիաներ: Ցանկացած պահի խոշոր երկրները իրենց քաղաքական շահը պաշտպանելու համար կարող են օգտագործել այդ անդրազգային կորպորացիաները: Սա քաղաքական լուրջ լծակ է, որն ավելի ընդգծված է հիմա և գնալով ավելի ակտուալ է դառնում»,- ասում է Վ. Խաչատրյանը:
