«Առաջին լրատվականը» տեղեկացրել էր, որ Թուրքիայի վարչապետ Ռեջեփ Թայիփ Էրդողանը օրերս պաշտոնական այցով գտնվել է Գերմանիայում և մի շարք աղմկահարույց հայտարարություններ արել ԵՄ-Թուրքիա հարաբերությունների, Գերմանիայում ապրող թուրքերի ինքնության և մի շարք այլ խնդիրների վերաբերյալ: Այս օրերին նա հարցազրույց է տվել գերմանական Hannoversche Allgemeine թերթին` անդրադառնալով նաև հայ-թուրքական հարաբերություններին:
Էրդողանը մասնավորապես նշել է, որ մեծ կարևորություն է տալիս տարածաշրջանում խաղաղության, անվտանգության և կայունության հաստատմանը: Այդ պատճառով Թուրքիան սկսել է Հայաստանի հետ հարաբերությունների բարելավման գործընթացը: 2009 թ. հոկտեմբերի 10-ին ստորագրված արձանագրությունները Էրդողանը մեծ հաջողություն է անվանել` նշելով, որ նրանցում համաձայնեցված դրույթները դրական ազդեցություն կունենան հարավկովկասյան ողջ տարածաշրջանի վրա: «Այդ ամենով հանդերձ, թե՛ թուրքերի և թե՛ հայերի համար կարգավորման այս գործընթացը շատ դժվար և զգայուն պրոցես է»,- նշել է Էրդողանը:
Նա նաև ավելացրել է, որ Թուրքիան չի անտեսում այն դժբախտությունները, որոնք վերապրել են հայերը: «Սակայն մենք դեմ ենք, որպեսզի մեկ կողմը մյուսին ներկայացնի որպես Ցեղասպանություն գործած: Այդ դիրքորոշումը չի ընդունում այն կորուստները, որ կրել է Թուրքիան, և հաշվի են առնվում միայն հայերի ասածները: Մենք հավատացած ենք, որ Ցյուրիխում ստորագրված արձանագրություններով նախատեսված պատմական հանձնաժողովը կարևոր դեր կխաղա»,- ասել է Էրդողանը:
