Ինչպես հայտնում է РИА-Новости գործակալությունը, Ռուսաստանի նախագահ Դմիտրի Մեդվեդևը ԽՍՀՄ նախագահ Միխայիլ Գորբաչովին պարգևատրել է Սուրբ առաքյալ Անդրեյ Պերվոզվանիի շքանշանով: Հրամանագրի ստորագրման մասին Մեդվեդևն անձամբ ասել է Գորբաչովին «Գորկի» նստավայրում տեղի ունեցած հանդիպման ժամանակ, նշում է ИТАР-ТАСС գործակալությունը:
Դմիտրի Մեդվեդևը խոստացել է շքանշանը հանձնել ինչպես հարկն է` Կրեմլում, փոխանցում է РИА Новости գործակալությունը: Նա նշել է, որ այս մրցանակը համարժեք գնահատական է համարում այն աշխատանքին, որը Գորբաչովը կատարել է:
Մարտի 2-ին Գորբաչովը դարձավ 80 տարեկան: Նա իր հոբելյանն այսօր կնշի Մոսկվայում: Հոբելյանական երեկոյին հրավիրված է ավելի քան 300 մարդ: Գորբաչովի խոսքերով, սա լինելու է «անձնական, ընտանեկան և ընկերական միջոցառում»:
Գորբաչովը վերջերս Վլադիմիր Պոզների հետ հանդիպման ժամանակ նշել էր, որ մարտի վերջին Լոնդոնում կկայանա Gorby 80 համերգը, որը նվիրված է լինելու ԽՍՀՄ նախագահի 80-ամյակին: Միջոցառումը տեղի կունենա Albert Hole-ում:
Այդ միջոցառմանը ելույթ կունենան Թագավորական ֆիլհարմոնիկ նվագախումբը, «Տուրեցկու երգչախումբը» և Լարա Ֆաբիանը:
Տեղեկացնենք, որ Անդրեյ Պերվոզվանիի շքանշանը համարվում է ՌԴ-ի բարձրագույն պարգև: