Պարսից ծոցի երկրերը, որոնք ընդգրկված են Նավթ արտահանող երկրների կազմակերպության՝ OPEC նավթային կարտելի կազմում ցանկանում են սև ոսկու գինը նվազեցնել մեկ բարելի դիմաց 100 դոլարի: Նման հայտարարությամբ են հանդես եկել Պարսից ծոցի նավթ արտահանողների ներկայացուցիչները: Այս մասին հայտնում է Вести Экономика-ն:
OPEC-ը կարծում է, որ մեկ բարելի դիմաց 100 դոլար արժեքը ընդունելի է ինչպես արտահանողների, այնպես էլ նավթի սպառողների համար:
Սեպտեմբերի սկզբներին Սաուդյան Արաբիայի Նավթաարդյունաբերության նախարար Ալի Ալ-Նաիմին արդեն հայտարարել էր, որ մեկ բարելի դիմաց 100 դոլար արժեքը իդեալական կլինի բոլոր կողմերի համար: Խոսքը գնում է Brent տեսակի նավթի արժեքի մասին, որը դիտարկվում է որպես սև ոսկու համաշխարհային արժեքի հիմնական ցուցիչ:
Պարսից ծոցի երկրների նավթաարդյունաբերական ոլորտի պաշտոնյաների կարծիքով՝ մեկ բարելի 100 դոլարից բարձր արժեքը չի արտացոլում համաշխահային տնտեսությունում պահանջարկի և առաջարկի հիմնարար գործոնները:
Finmarket.ru-ի փոխանցմամբ՝ նախօրեին նավթի համաշխարհային գները նվազել էին եվրոյի նկատմամբ դոլարի աճի ֆոնին: Օգոստոսի 26-ի առևտրային արդյունքներով՝ Նյու-Յորքի NYMEX բորսայում WTI նավթի նոյեմբերյան ֆյուչերսների արժեքը իջել է 1,52%-ով և մեկ բարելի դիմաց կազմել 89,98 դոլար: Լոնդոնի ICE բորսայում Brent տեսակի նավթի նոյեմբերյան ֆյուչերսների գինը նվազել է 0,37%՝ կազմելով 110,04 դոլար:
