Լիբիայի առաջնորդ Մուամար Քադաֆին հայտարարել է, որ Լիբիայում ընդհանրապես խաղաղ ցույցեր չեն եղել, և որ բոլոր զոհերի համար մեղավոր են Ալ-Ղաիդայի ներկայացուցիչները Լիբիայում:
Այս մասին նա ասել է Ջամահիրիայի հռչակման 34-րդ տարեդարձի կապակցությամբ ունեցած ելույթի ժամանակ: «Ո՛չ Բենղազիում, ո՛չ Դերնայում, ո՛չ Ալ-Բայդայում խաղաղ բանակցություններ չեն եղել»,- նշել է նա:
Ըստ Քադաֆիի` Ալ-Ղաիդայի «քնած բջիջները» միանգամից ակտիվացել են` հրահրելով բախումներ:
«Նրանք են հենց կրակել մարդկանց վրա, և միայն այդ պատճառով է, որ զոհեր կան»,- ասել է Լիբիայի առաջնորդը` փորձելով մի քանի հարյուր զոհերի համար պատասխանատվությունը բարդել իբր ակտիվացած ահաբեկիչների վրա:
Քադաֆին ավելացրել է, որ զինվորները մարդկանց վրա կրակել է միայն այն ժամանակ, երբ վերջիններս հարձակվել են զենքի պահեստների վրա:
Քադաֆին նաև ասել է, որ ինքը չի կարող հեռանալ երկրի նախագահի պաշտոնից, քանի որ երբեք այդ պաշտոնը չի գրավել: «Մուամար Քադաֆին նախագահ չէ, որպեսզի հրաժարական տա: Լիբիան չունի նախագահ, որպեսզի նրան պաշտոնանկ անենք»,- ասել է Քադաֆին:
Իր բոցաշունչ ելույթում նա ավելի հեռու է գնացել` ասելով, որ իրականում «Լիբիայում ուղիղ ժողովրդավարություն է: Իշխանությունը գտնվում է ժողովրդի ձեռքում»:
Քադաֆին նաև զգուշացրել է, որ եթե ինքը գնա, իր փոխարեն գալու են օտարերկրացիները: Իսկ օտարերկրյա լրատվամիջոցներին էլ մեղադրեց իրադարձությունները սխալ մեկնաբանելու մեջ` ասելով, որ այլ կերպ չէր էլ կարող լինել, քանի որ նրանք Լիբիայում ներկայացված չեն:
Դիմելով համաշխարհային հանրությանը` Քադաֆին ասել է, որ ինքը պատրաստ է ընդունել ՆԱՏՕ-ի և ՄԱԿ-ի դիտորդներին և քննիչներին, որոնք տեղում կպարզեին և կհաստատեին իր ասածների ճշմարտացիությունը: