Մոտ օրերս ծրագրվում է հայտնել անգլիկան եկեղեցու նոր արքեպիսկոպոսի անունը, որն այդ պաշտոնում դեկտեմբերից կփոխարինի Ռոուեն Ուիլյամսին, որը Քենթերբերիի 104-րդ արքեպիսկոպոս է նշանակվել 2002 թվականին՝ 61 տարեկան հասակում:
Նշանակումների թագավորական հանձնաժողովը առաջիկա երեք օրերին կորոշի՝ ում վստահի բարձր եկեղեցական պաշտոնը: Այս մասին հայտնում է BBC-ն:
BBC-ի և ComRes հետազոտական ընկերության համատեղ անցկացրած սոցհարցումները վկայում են այն մասին, որ բրիտանական հասարակությունը ընդհանուր առմամբ դրական է գնահատում 10 տարի այդ պաշտոնը զբաղեցրած Ուիլյամսի գործունեությունը:
Հարցմանը մասնակցած 2500 բրիտանացիների մեծամասնությունը Ուիլյամսին լավ առաջնորդ է համարում: 1/4-ը կարծում է, որ նրա օրոք եկեղեցին զգալի ազդեցություն չի ունեցել ժամանակակից բրիտանացիների կյանքի վրա: Երկարատև քննարկումներից հետո, ուրբաթ օրը 16 հոգուց կազմված թագավորական հանձնաժողովը, պետք է վերջնական որոշում կայացնի: Նոր արքեպիսկոպոսի անունը հայտնի կդառնա հաջորդ շաբաթ:
Քանի որ եպիսկոպոսական պաշտոնում կանանց հնարավոր առաջադրման հարցով քվեարկությունը եկեղեցու տնօրինության կողմից հետաձգվել է մինչև նոյեմբեր, նոր արքեպիսկոպոսը տղամարդ կլինի: Թեկնածուներն են Լոնդոնի եպիսկոպոս Ռիչարդ Չարտրեսը, Քովենթրիի եպիսկոպոս Քրիստոֆեր Կոկսուորթը, Նորվիչի եպիսկոպոս Գրեմ Ջեյմսը, Դարեմի եպիսկոպոս Ջասթին Ուելբին և Յորքի արքեպիսկոպոս Ջոն Սենտամուն, որին համարում են անգլիկան եկեղեցում նշանակությամբ երկրորդ հոգևորականը:
Թեկնածուների հավաքագրման գործընթացը սկսել էր մարտից, այն բանից հետո, երբ Ուիլյամսը հայտարարեց մինչև տարեվերջ պաշտոնը լքելու մասին: 2013-ի հունվարին նա կզբաղեցնի Քեմբրիջի համալսարանի Մագդալենայի քոլեջի տնօրենի պաշտոնը:
