Ռյազանի մարզում ձերբակալվել է «Հայրապետովներ» հանցավոր խմբավորման՝ ազատության մեջ գտնվող նախավերջին անդամը: Այս մասին հաղորդում է ՌԴ քննչական կոմիտեի կայքը:
Ձերբակալվածը, որի անունը չի հաղորդվում, հետախուզման մեջ էր 1999 թվականի դեկտեմբերից: Նրան մեղադրում են ՌԴ քրեական օրենգրքի 209 (ավազակություն), ինչպես նաև 102 (սպանություն) և 148 (շորթում) հոդվածներով: Մասնավորապես, ենթադրվում է, որ 1994 թվականի դեկտեմբերին Յարոսլավլում նա սպանել է Պաչուն մականունով օրենքով գող Յուրի Պաչուաշվիլիին:
Բանդան ստեղծվել է Ռյազանում 1993 թվականին: «МедиаРязань» գործակալության տվյալներով՝ խմբավորումը անմիջապես սկսել է հակամարտել «Սլոնի» խմբավորման դեմ: 1993 թվականի մարտին «Հայրապետովների» առաջնորդ Վիկտոր Հայրապետովը (Վիտյա Ռյազանսկի) դաժան ծեծի էր ենթարկել հակառակորդ խմբավորման առաջնորդ Վյաչեսլավ Երմոլովին (Սլոն): Դրանից հետո «Սլոնի» խմբավորման անդամները ներխուժել էին շոգեբաղնիք, որտեղ հանգստանում էին «Հայրապետովները» և ծեծել նրանց: Սակայն խմբավորման առաջնորդը այնտեղ չէր եղել:
1993-ի նոյեմբերին ինքաձիգներով զինված 5 հանցագործներ ներուժել են Рязсельмаш գործարանի ակումբ, որտեղ գտնվել են «Հայրապետովները»: Սպանվել է բանդայի 8, վիրավորվել 9 անդամ: Հայրապետովը թաքնվել էր սյան հետևում և չէր տուժել:
Այդ միջադեպից հետո Հայրապետովը տեղափոխվել էր Մոսկվա և շարունակել այնտեղից ղեկավարել բանդան: 1994 թվականի մարտին Մոսկվայում սպանել են Երմոլովի գլխավոր զինակից Նիկոլայ Մաքսիմովին (Մաքս): Նրա հուղարկավորության ժամանակ Ռյազանի Համբարձման տաճար պետք է ներխուժեր «Հայրապետովներ» բանդայի անդամ, Ռյազանի «Սպարտակ» ֆուտբոլային ակումբի մարզիկ Սերգեյ Մանիկինը: Նրան հանձնարարված էր տաճար գցել պայթուցիկ սարք: Սակայն ռումբը պատահաբար ժամանակից շուտ էր գործի գցվել: Մանիկինը ծանր վիրավորվել էր տաճարից 150 մետր հեռավորության վրա: Երմոլովի թիկնապահները նրան հայտնել են, որ շտապօգնություն կկանչեն՝ պայմանով, որ ասի, թե իրեն ով է ուղարկել: Սակայն նա հրաժարվել է և շուտվ մահկանացուն կնքել:
Գործակալությունը նշում է, որ 1994-ի կեսերին բանդաների պայքարը սրվել էր, սակայն իրավապահները դրան մեծ ուշադրություն սկսել են դարձնել մի քանի տարի անց: «Իհարկե, մենք գիտեինք հանցագործությունների մասին և հետաքննում էին դրանք, սակայն դրանք մի շղթայով կապակցելը շատ դժվար էր»,- հայտնել է Դմիտրի Պլոտկինը, որը 1991-2007 թթ. եղել է Ռյազանի դատախազության քննիչ:
«Հայրապետովների» դեմ գործ է հարուցվել 1997-ի հոկտեմբերին: Բանդայի դատավարությունը անցկացվել է 2004-2007 թթ.: Ազատազրկման տարբեր ժամկետներ են ստացել 20 մարդ, երկուսը մնացել էին հետախուզման մեջ:
Երմոլովը, չհաստատված տեղեկություններով, այժմ Եվրոպայում զբաղվում է բիզնեսով: Հայրապետովը պաշտոնապես սպանված է համարվում, սակայն գոյություն ունի վարկած, որ նա բեմականացրել է իր մահը և այժմ ապրում է այլ անվան ներքո, թաքնվում է նույնիսկ սեփական կնոջից: Կինն ամուսնուն մեռած է համարում:
