Ինչպես գրում է ռուսական Коммерсант թերթը, նախօրեին Ղրղզստանի նախագահ Ռոզա Օթունբաևան պաշտոնական այցով գտնվում էր Բրյուսելում, որտեղ խոստացել է ապահովել Արևմուտքի հետ ինտեգրման գործընթացների դրական ընթացքը և համագործակցել ՆԱՏՕ-ի հետ:
Սակայն այս խնդիրը չէ, որ մտահոգում է Մոսկվային, այլ այն, որ Ղրղզստանում ռուսական գործարարներին զրկում են ունեցվածքից:
«Ղրղզստանը շարունակելու է ձգտել համապատասխանելու ժողովրդավարության և տնտեսության ոլորտներում բոլոր եվրոպական չափանիշներին` վերահաստատելով իր զարգացման եվրոպական կողմնորոշումը»,- ասել է Օթունբաևան ԵՄ նախագահ Հերման վան Ռոմպոյի հետ հանդիպման ժամանակ:
Օթունբաևան նաև հանդիպել է ՆԱՏՕ-ի գլխավոր քարտուղար Անդերս Ֆոգ Ռասմուսենի հետ: Վերջինս աջակցություն է հայտնել Ղրղզստանի իշխանություններին` խոստանալով օգնել այդ երկրի բանակի արդիականացմանը:
Մոսկվայում լուրջ մտահոգություն ունեն ղրղզական իշխանությունների այս քայլերի հետ կապված, քանի որ այդ երկիրը Հավաքական անվտանգության պայմանագրի կազմակերպության անդամ է: Բացի այդ, Օթունբաևան ընտրվելուց հետո պաշտոնական այցով չի եղել Մոսկվայում` այցելելով Ռուսաստանի մայրաքաղաք միայն անցած տարվա վերջում ԱՊՀ գագաթնաժողովի ժամանակ:
Սակայն Մոսկվային առավել մտահոգում է այն փաստը, որ ռուսական բիզնեսի ձեռքից վերցնում են ամենաեկամտաբեր ձեռնարկությունները, որոնք գործում են Ղրղզստանի տարածքում` գործարաններից մինչև հեռահաղորդակցության ոլորտի առաջատար Alfa Telecom-ը: Ընդ որում, դրանք կա՛մ պետականացվում են, կա՛մ փոխանցվում այլ մասնավոր ներդրողների:
Սակայն Մոսկվան կարողանում է նաև հակազդել սրան, քանի որ երկրում քիչ չեն այդ երկրի հետ ռազմավարական գործընկերության կողմնակիցները: Բացի այդ, Մոսկվան չի շտապում իրականացնել մի քանի միլիարդ դոլարի արժողությամբ ծրագրերը, որոնց մասին պայմանագրեր ստորագրվել են դեռ 2009 թ.` Կուրմանբեկ Բակիևի իշխանության տարիներին, այդ թվում` 1.7 մլրդ դոլարի վարկի տրամադրումը Կաբարատինսկի հէկ-ին, ինչպես նաև համատեղ ռազմաբազա կառուցելու համար:
