Աշտարակ քաղաքում կիրակի օրը կայացած ՏԻՄ ընտրություններում քաղաքապետ ընտրվեց ՀՀԿ-ի անկուսակցական թեկնածու Արմեն Անտոնյանը՝ ստանալով 4745 քվե: Նրա մրցակից Ռազմիկ Տերտերյանը ստացավ 4227 ձայն:
Աշտարակի քաղաքապետի ընտրություններում բավական հետաքրքիր իրավիճակ էր ստեղծվել: ՀԱԿ-ն ու ԲՀԿ-ն ոչ պաշտոնապես սատարում էին նույն թեկնածուին՝ վերջերս ՕԵԿ շարքերը լքած Ռազմիկ Տերտերյանին: ՀՀԿ-ն ու ՕԵԿ-ը սատարում էին անկուսակցական Արմեն Անտոնյանին: Հանրապետական թեկնածու Ռուշան Մկրտչյանին ոչ ոք չէր սատարում:
«Իշխանական լծակներն ամբողջությամբ օգտագործվեցին: Չգիտեմ, դա արդա՞ր է, թե՞ անարդար, դուք դատեք»,- մեզ հետ զրույցում ասաց պարտված թեկնածու Ռազմիկ Տերտերյանը, ով զանգել, շնորհավորել էր Արմեն Անտոնյանին: Ռազմիկ Տերտերյանի խոսքերով, բուն տեղամասերում խախտումներ համարյա չեն եղել: Լծակները գործի են դրվել մինչ այդ: Օրինակ` որոշ հիմնարկներում ենթականերին ասել են, եթե չընտրեք ՀՀԿ թեկնածու Արմեն Անտոնյանին, աշխատանքից կազատենք: «Ես չեմ գնացել, «զապիս» արել, բայց շշուկները գալիս, հասնում են: Բացի դա, իշխանական թեկնածուն պետական բոլոր հիմնարկներում հանդիպում է ունեցել, ես մենակ հանդիպել եմ ռադիոֆիզիկայի ինստիտուտում: Մյուս հիմնարկությունների տնօրենները խուսափում էին: Նույն հաջողությամբ իշխանական թեկնածուն ինչքան ուզում էր, հանդիպում էր պետական հիմնարկների, դպրոցների աշխատողների հետ: Հատուկ դպրոցների տնօրենները հրավիրում էին, որ հանդիպում լինի իշխանական թեկնածուի հետ, իսկ ինձ մերժում էին»,- պատմեց թեկնածուն: Ըստ նրա` իրեն աջակցողները ոչ միայն հիասթափված չեն, այլև ոգևորված են, որ առանց լծակների ու գումարի 4200 ձայն է հավաքել: «Պարզապես անթույլատրելի կլիներ, եթե իմ ձայները գողանային, լցոնումներ անեին, դա իրանց համար սև օր կլիներ: Մենք արեցինք հնարավորինը, որ որևէ բան փոխվեր մեր Աշտարակի կյանքում, չստացվեց»:
Աշտարակի քաղաքապետի թեկնածու Ռազմիկ Տերտերյանին մասնավորապես սատարում էր Ապարանի նախկին քաղաքապետ, ՀԱԿ անդամ Ռազմիկ Պետրոսյանը: Մեր հարցին, թե փաստորեն ՀԱԿ-ն ու ԲՀԿ-ն նույն թեկնածուին էին սատարում Աշտարակում, սա կարելի՞ է որպես ՀԱԿ-ԲՀԿ համագործակցություն դիտել, ՀԱԿ անդամ Ռազմիկ Պետրոսյանն ասաց. «Ստացվել է, որ մենք նույն թեկնածուին ենք պաշտպանում: ՀԱԿ-ը պաշտոնապես չի հայտարարել, ԲՀԿ-ն էլ կարծեմ չի հայտարարել: Հիմնականում ավելի շատ անձերի տարբերակով, անհատների, հանդիպումների արդյունքով է ստացվել: Բայց ՀԱԿ-ը պաշտոնապես չի հայտարարել սատարելու մասին: Քննարկել ենք հարցը շտաբում, մեծամասնությունը կողմ է եղել, որ պաշտպանենք, բայց որոշում չունենք»:
Օրեր առաջ Աշտարակի քաղաքապետի ԲՀԿ թեկնածուն ինքնաբացարկի դիմում էր ներկայացրել, այն պարագայում, երբ ԲՀԿ-ն խորհրդարանական ընտրություններում Աշտարակում մոտ 2 հազար ձայնով հաղթել է ՀՀԿ-ին: Այսպիսով, խորհրդարանական ընտրությունների արձանագրած պատկերը փոխվեց Աշտարակում, թեև ԲՀԿ-ն ոչ պաշտոնապես էր սատարում Տերտերյանին:
Նշենք, որ Աշտարակի գործող քաղաքապետը՝ ՀՀ գլխավոր դատախազի տեղակալ Արամ Թամազյանի եղբայրը, չէր առաջադրվել: «Գլխավոր ապարանցի» և գլխավոր դատախազ Աղվան Հովսեփյանի թեկնածուն, որոշ տեղեկություններով, «Աշտարակի ձոր» հայտնի ռեստորանի տերն էր` Կարեն Գևորգյանը (Ձորի Կարիկ), որը 90-ականներին եղել է քաղաքապետ, սակայն նրան չպաշտպանեց ՀՀԿ-ն: ՀՀԿ ղեկավարությունը որոշեց սատարել Անտոնյանին, ու նա չառաջադրվեց:
Հիշեցնենք, որ ՏԻՄ ընտրությունները ՀՀԿ-ում ղեկավարում է Հովիկ Աբրահամյանը: Կարեն Գևորգյանն իր հերթին պաշտպանում էր ՀՀԿ թեկնածու Արմեն Անտոնյանին, ով իր մանկության ընկերն է:
