Երկուշաբթի օրվա առևտրային արդյունքներով` նավթի համաշխարհային գները նվազել են` Գերմանիայից ստացված վիճակագրության և Հունաստանում իրավիճակի հետ կապված ներդրողների մտավախությունների ֆոնին: Այս մասին հաղորդում է BBC-ն:
Առևտրային օրվա ավարտին WTI ամերիկյան թեթև տեսակի նավթի նոյեմբերյան ֆյուչերսների արժեքը նվազել է 0,96 դոլարով՝ 1 բարելի դիմաց հասնելով 91,93 դոլարի:
Հյուսիսծովյան Brent նավթային խառնուրդի նոյեմբերյան ֆյուչերսների գները նվազել են 1,61 դոլարով` 1 բարելի դիմաց հասնելով 109,81 դոլարի:
Կիրակի եվրոպական ԶԼՄ-ներում տեղեկություն հայտնվեց այն մասին, որ Հունաստանի վարկատուների սպասվող զեկույցում կասվի այն մասին, որ Աթենքին կարող է մինչև 20 մլրդ եվրո հավելյալ ֆինանսավորում անհրաժեշտ լինել:
Բացի այդ, համաձայն նոր տվյալների`Գերմանիայում գործարար մթնոլորտի ցուցիչը սեպտեմբերին իջել է 101,4 կետի` օգոստոսի 102,3 կետի համեմատ, այն դեպքում, երբ վերլուծաբանները ցուցիչի աճ էին կանխատեսել:
