Եվրոգոտու քաղաքական գործիչները համաձայնության են եկել Եվրոպական կայունացման մեխանիզմը (ESM) 4 անգամ մեծացնելու հարցի շուրջ: Այն 500 միլիարդից կհասնի 2 տրիլիոն եվրոյի: Այս մասին հաղորդում է Der Spiegel-ը՝ հղում անելով բանակցային կողմերին մոտ անանուն աղբյուրներին:
Հրատարակության տվյալներով՝ ESM-ի ընդլայնման դեմ հանդես են եկել մի շարք երկրներ, մասնավորապես` Ֆինլանդիան, սակայն մեծ մասը ողջունել է այդ քայլը: Հակաճգնաժամային մեխանիզմի ռեսուրսների աճը անհրաժեշտություն է համարում խոշորագույն ներդրող Գերմանիան: Ենթադրվում է, որ մեխանիզմի ընդլայնումը թույլ կտա անհրաժեշտության դեպքում փոխառու ռեսուրսներով ապահովել այնպիսի խոշոր տնտեսությունները, ինչպիսիք են Իտալիայի և Իսպանիայի տնտեսությունները:
Եվրոպական կայունացման մեխանիզմը կկիրառի նույն պայմանները, ինչ Ֆինանսական կայունության եվրոպական հիմնադրամը՝ EFSF-ը: Մեխանիզմի միջոցները, որոնք ստացվում են Եվրամիության անդամ պետություններից, կօգտագործվեն պարտքային ճգնաժամի մեջ հայտնված երկրների օգնության համար:
ESM-ը սկսել է աշխատանքը այս տարվա հուլիսին` որպես մշտական հիմնադրամ: Նրա նախորդը՝ EFSF-ը, ստեղծվել էր որպես ժամանակավոր կառույց: Եվրոպացի քաղաքական գործիչները ծրագրում են կառույցի գործունեությանը վերջ դնել 2012-ի վերջին կամ 2013-ին: Ներկայում հիմնադրամի ծավալը կազմում է 440 մլրդ եվրո:
Հակաճգնաժամային հիմնադրամներից բացի` Եվրոպայի տնտեսությանն աջակցում է նաև Եվրոպական Կենտրոնական բանկը, որը սեպտեմբերի սկզբին հայտարարել է արժութային միության երկրների պարտատոմսերի անսահմանափակ գնման մեկնարկի մասին:
ESM-ն ու EFSF-ը բազմիցս ենթարկվել են եվրոպացի քաղաքական գործիչների, առաջին հերթին՝ ընդդիմադիրների քննադատություններին, քանի որ այդ հիմնադրամները պարտքերի մեջ խրված պետություններին օգնում են առավել պահպանողական բյուջետային քաղաքականություն ունեցող երկրների հաշվին:
