Ձկնաբույծների միության նախագահ Արթուր Աթոյանը շարունակում է պնդել, որ Ռուսաստանը քաղաքական նպատակներով է արգելում հայկական «Իշխան»-ի մատակարարումը՝ շեշտելով, որ ՀՀ արտադրանքի հիմնական մրցակիցը ՌԴ-ում թուրքական ձկնեղենն է:
«Առաջին լրատվական»-ի հետ զրույցում Ա. Աթոյանը նշեց, թե Ռուսաստանի անասնաբուժական և ֆիտոսանիտարիայի դաշնային ծառայությունը («Ռոսսելխոզնադզոր») պաշտոնական երկու գրություն է ուղարկել, որոնք միմյանց հակասում են:
«Մտադիր ենք հարցը բարձրագույն ատյանների միջոցով ներկայացնել: Երկուշաբթի հեռագիր կտրվի ՀՀ նախագահին և վարչապետին: Այս հարցով վարչապետը համապատասխան հանձնարարականներ է տվել բնապահպանության և գյուղատնտեսության նախարարություններին՝ խստագույնս ուսումնասիրելու հարցը: Ամենայն պատասխանատվությամբ հայտարարում եմ՝ սա միմիայն պատվեր է: Մեր անմեղության մեջ համոզված ենք, ընդհուպ մինչև եվրոպական դատական ատյաններ ենք դիմելու»,- ասաց Ա. Աթոյանը:
Նա հավելեց, թե այժմ ռուսական կողմին անհանգստացնում է այն, որ հարցը պետական մակարդակի է բարձրանում, այդ պատճառով էլ 1-2 կազմակերպությունների մասին են խոսում, սակայն «4 կազմակերպության («Յունիֆիշ», «Ակվատեխավտոմատիկա», «Դմիտրի» և «Գոս») հետևից կտրուկ արշավանք էին սկսել դեռ 1,5 ամիս առաջ, իսկ հիմա կոնկրետ գործողությունների են անցնում»:
Նա կրկին որպես օրինակ բերեց «Դմիտրի» ընկերությունը, որը ձուկ է արտահանում նաև Եվրոպա, որտեղ ավելի խիստ ստուգումներ են անցկացնում, սակայն ոչինչ չեն գտել:
Նշենք, որ ընդհանուր առմամբ ՀՀ-ից ՌԴ ձուկ արտահանում են մոտ 30 ընկերություններ, որոնց թիվը տարեցտարի ավելանում է: Արտահանման հիմնական ուղղությունը Ռուսաստանն է, որոշ չափով ձուկ առաքվում է նաև Եվրոպա և Վրաստան:
Հավելենք նաև, որ հավաստի աղբյուրներից «Առաջին լրատվական»-ին հայտնեցին, որ ամբողջ աղմուկի միակ պատճառն այն է, որ «Դմիտրի» ընկերության սեփականատերը Ա. Աթոյանի փեսան է: Հայտնի է, նաև որ «Ակվատեխավտոմատիկա» ՍՊԸ-ն ղեկավարում է Ձկնաբույծների միության նախկին նախագահ Արկադի Գրիգորյանը, ով այսպես ասած՝ միության նախագահությունից «կենսաթոշակի» է անցել:
Այսինքն` ստացվում է, որ զուտ անձնական շահից ելնելով են 1 բաժակ ջրում փոթորիկ սարքում, ինչը, սակայն, կարող է մեծապես ազդել ձկնաբուծության ոլորտի զարգացման վրա:
