2011 թվականին պետբյուջեով Տավուշի մարզում կշարունակվեն ճանապարհաշինական ծրագրերը: Մասնավորապես, կնորոգվի Վարագավանք տանող 1.5 կմ ճանապարհը: Միաժամանակ Համաշխարհային բանկի վարկային աջակցությամբ փուլերով կնորոգվի Բերդ-Արծվաբերդ-Այգեձոր-Չինարի 32.5 կմ ճանապարհը:
Անցած տարի մարզում կատարված ճանապարհաշինական աշխատանքները կազմել են 3,3 միլիարդ դրամ:
Համաշխարհային բանկի 392 միլիոն դրամով հիմնանորոգվել է Աչաջուր-Մակարավանք 3.676 կմ ճանապարհը, 653 միլիոն դրամով էլ հիմնանորոգվել է միջպետական ճանապարհ-Լուսահովիտ 5.536 կմ ճանապարհը: Պետբյուջեի 701 միլիոն դրամ ֆինանսավորմամբ հիմնանորոգվել է Նորաշեն-Մովսես 8.8 կմ ճանապարհը:
Անցյալ տարի Դիլիջան համայնքում իրականացվել են 404 միլիոն դրամի ճանապարհաշինական աշխատանքներ: Գերմանական տեխնիկական համագործակցության ֆինանսավորմամբ, ՄԱԿ-ի և համայնքների ներդրումներով վերականգնվել է Դիլիջանի Հակոբջանյան փողոցի հենապատը, Աղավնավանքի Վերին և Ներքին թաղամասերը կապող կամուրջը:
Աղետներից տուժած ճանապարհների վերականգնման ծրագրով աշխատանքներ են կատարվել Դիլիջան քաղաքում, Հաղարծին գյուղում, վերականգնվել է միջպետական ճանապարհի` սողանքից փլուզված Հովքի հատվածը, կառուցվել սողանքի գոտին շրջանցող ճանապարհ, նորոգման աշխատանքներ են արվել Դիլիջանի ավտոմոբիլային թունելի մուտքի մոտ:
