Երկու տարվա արգելքից հետո YouTube-ը Թուրքիայում կրկին հասանելի կլինի:
Ինչպես հայտնում է BBC-ն, Թուրքիայի համացանցային հարցերի պատասխանատու` տրանսպորտի նախարար Բինալի Յըլդրըմը տեղեկացրել է, որ Թուրքիայի կառավարությունը կապի մեջ է եղել YouTube-ի սեփականատեր Google ընկերության հետ և որ կայքն արգելելու պատճառներն այլևս գոյություն չունեն` Աթաթուրքին անարգող տեսանյութերը հեռացված են:
Հիշեցնենք, որ արգելքի պատճառ դարձած տեսանյութում, որը տեղադրել էին հույն օգտագործողները, Մուստաֆա Քեմալ Աթաթուրքը և թուրքերը անվանվում էին միասեռական: Աթաթուրքին և թուրքականությունը վիրավորելը Թուրքիայում համարվում է քրեական հանցագործություն:
Հիշյալ արգելքը լայն քննադատություն տեղիք էր տվել ինչպես աշխարհում, այնպես էլ բուն Թուրքիայում, այդ թվում` նախագահ Աբդուլլահ Գյուլի կողմից, որը պաշտոնյաներին խնդրել էր լուծում գտնել:
Ելույթ ունենալով հեռուստատեսությամբ` Յըլդրըմն ասել է, որ իրենք արգելքը հանել են այն բանից հետո, երբ «գերակայել է առողջ բանականությունը»: Այդ ճանապարհը, նրա խոսքերով, հեշտ չի եղել, և այժմ իրենք հույս ունեն, որ մյուս կողմը նույնպես դասեր է քաղել կատարվածից ու այսուհետ Թուրքիայում իր գործունեությունը կծավալի միայն այդ երկրի օրենքների սահմաններում:
Իր հերթին, այս առիթով հաղորդագրություն է տարածել YouTube-ը, որում նշում է, որ տեսանյութերը հեռացվել են ոչ թե YouTube-ի, այլ երրորդ անձի կողմից` հեղինակային իրավունքի բողոքների ավտոմատ համակարգի (automated copyright complaint process) միջոցով: «Մենք ուսումնասիրում ենք` արդյոք սա չի հակասում մեր հեղինակային իրավունքների կանոնակարգին», ասված է ընկերության հաղորդագրության մեջ:
Համաձայն ԵԱՀԿ հունիսյան զեկույցի` Թուրքիայում արգելված են մոտ 5000 կայքեր, ինչն աշխարհում ամենաբարձր ցուցանիշներից է: