Խորհրդարանը կանգնած է անժառանգ մնալու վտանգի առաջ: «Ժառանգություն» կուսակցությունը երեկ սպառնաց կա՛մ վայր դնել մանդատները, կա՛մ բոյկոտել ԱԺ աշխատանքները:
Թեև խոստացել էին այդ մասին իրենց որոշումը կայացնել օրվա ընթացքում, սակայն օրվա վերջում նրանք հանդես եկան հայտարարությամբ՝ տեղեկացնելով, որ այդ հարցում վերջնական որոշում կկայացնեն մարտի 6-ին նոր միայն: Սա, թերևս, «Ժառանգություն» խմբակցության կողմից առաջին դեպքը չէ, որ իշխանություններին «վախեցնում են» մանդատները վայր դնելով կամ բոյկոտ հայտարարելով, սակայն իրենց վրա որոշ ժամանակ ուշադրություն բևեռելուց հետո հայտարարում են, թե այնուամենայնիվ, չեն գնա այդ քայլին: Մանավանդ, եթե հաշվի առնենք, որ ԱԺ հերթական ընտրություններին մնացել է մոտ մեկ տարի ժամանակ, իսկ խորհրդարանի ամբիոնը հասարակությանը երևալու հրաշալի տեղ է, հասկանալի է, որ ոչ մի գնով «Ժառանգությունն» իրեն խորհրդարանից դուրս չի դնի: Լավագույն դեպքում նրանք կարող են հայտարարել մասնակի բոյկոտ, երբ ԱԺ ամբիոնն օգտագործում են միայն հայտարարությունների ժամին և կառավարության հետ հարցուպատասխանի օրերին, իսկ մնացած ժամանակ սկզբունքորեն չեն մասնակցում օրենսդիրի աշխատանքներին:
Ինչևէ, երեկ առավոտյան ԱԺ նիստի ժամանակ Րաֆֆի Հովհաննիսյանը հանդես եկավ հայտարարությամբ՝ քննադատելով կոալիցիոն վերջին հուշագիրը, այն որակելով որպես հակասահմանադրական, հակաիրավական: «Իմաստը ոչ միայն ժամանակից շուտ, ի խախտումն համապատասխան բոլոր օրենքների սեփական թեկնածության առաջադրումն էր, այլ պատգամը հասարակության, որ «պետությունը ես եմ, և իմ դեմ խաղ չկա: Այդ քաղաքականությունը, որը տևապես զիջում է մեր պետականությունը և ազգային շահը, շարունակվելու է առնվազն 7 տարի, այդ ներքին քաղաքականությունը, որը խորացնում է անհավասարությունը, անօրինականությունը և արտագաղթը, շարունակվելու է նվազագույնը 7 տարի», – հայտարարեց Րաֆֆի Հովհաննիսյանը՝ հավելելով. «Այս խորհրդարանի առարկայական պատկերը արտացոլանքն է հերթական խեղված և կեղծված ընտրությունների, բայց, ցավոք սրտի, այս համամասնությունը մեծամասնության և ընդդիմության չի բավականացնում կուսակցապետերի ախորժակը, և իրենց հայացքն ուղղել են սակավաթիվ ընդդիմադիր այս աթոռների վրա: Հարկ չկա կեղծել հերթական ընտրությունը, ինչպես սուրբ պատարագն է ասում` սիրով, ճշմարտությամբ և երբեք հեգնանքով` առեք, կերեք, սա է «ժառանգությունը ձեր», – հայտարարեց Րաֆֆի Հովհաննիսյանը: Այս խոսքերից հետո «Ժառանգության» պատգամավորները լքեցին Ազգային ժողովի նիստերի դահլիճը:
Իսկ ՀՅԴ խմբակցությունն ԱԺ քառօրյայի օրակարգի քվեարկությունից առաջ 20 րոպեանոց ընդմիջում խնդրեց: Ընդմիջման ժամանակ ՀՅԴ խմբակցության ղեկավար Վահան Հովհաննիսյանն ու ՀՅԴ ԳՄ ներկայացուցիչ Արմեն Ռուստամյանը գնացին «Ժառանգություն» խմբակցության ղեկավար Ստեփան Սաֆարյանի աշխատասենյակ՝ քննարկելու ստեղծված իրավիճակն ու հետագա քայլերը: Սակայն պարզվեց, որ «Ժառանգությունը» դեռ պետք է նիստ անի, որոշում կայացնի, որից հետո ՀՅԴ հետ կքննարկեն քայլերը: Իսկ որոշումը, փաստորեն, «Ժառանգությունը» կկայացնի մարտի 6-ին նոր միայն՝ «Ժառանգության» խորհրդի ընդլայնված նիստի ժամանակ:
«Ժամանակ» օրաթերթ