Արմավիր քաղաքի քաղաքապետի` 2011 թ. մարտի 20-ին կայանալիք ընտրություններում առաջադրվել են հինգ թեկնածուներ: Գործող քաղաքապետ ՀՀԿ անդամ Ռուբեն Խլղաթյանը, ՀՅԴ-ից ՀՀԿ դարձած, հիմա այսօր անկուսակցական Առնակ Գևորգյանը, Իսպանիայից առանց ընտանիքի օրերս վերադարձած անկուսակցական Հայկազ Եղոյանը, Արմավիր քաղաքի ավագանու անդամ, Մոսկվայում բիզնեսի տեր, անկուսակցական Սևակ Մինասյանը և դատախազության նախկին քննիչ, մասնագիտական կարիերան սերիալներում շարունակող, անկուսակցական Կարեն Վարդանյանը:
Թեկնածուներից յուրաքանչյուրը արդեն իրեն քաղաքապետ է պատկերացնում: Բայց ամենից շատ համոզված է գործող քաղաքապետը:
Արմավիրում պատմում են, որ երկու անգամ նա ընտրակեղծիքներով ընտրվել է: Այս անգամ էլ քաղաքապետը շահարկում է «դաբրոյի» հարցը: Ըստ քաղաքապետի` «դաբրոն կա, ու ընտրեն – չընտրեն, ստիպված են ևս չորս տարի հանդուրժել և հաշտվել իր քաղաքապետ լինելու հետ»: Բայց առայժմ նա դաբրո ունի միայն ՀՀԿ Արմավիրի շրջանային խորհրդից:
15-հոգանոց նիստում խորհրդի նախագահ, մարզպետ Աշոտ Ղահրամանյանը խորհրդի անդամներին առաջարկեց քաղաքապետի ընտրություններին սատարել Ռուբեն Խլղաթյանին: Ներկաներից ոմանք նկատեցին, որ մարզպետը համարյա բերանի մի ծայրով այդ մասին հայտարարեց, ինչը թույլ է տալիս մտածել, որ «դաբրոն» դեռ չկա:
Արմավիրում համոզված են, որ կուսակցությանը հարգող ոչ մի հանրապետական չի ընտրի գործող քաղաքապետին, որովհետև չեն կարողանում հիշել, թե 8 տարիների ընթացքում ինչ լավ բան է արել: Ասենք` Խլղաթյանը ինքն էլ չի կարող նշել: Խլղաթյանը գոնե մի երկու փողոց վերանորոգեր, կենտրոնական փողոցները լուսավորեր, աղբահեռացում աներ:
Ի դեպ, մրցույթներում, բացի իր և իր ընտանիքի անդամների կազմակերպություններից, ոչ մեկը, չգիտես ինչու, չի հաղթում:
Փոխարենը մարդը մանկապարտեզների խաղահրապարակներն է վաճառում, փողոցի լուսավորման համար ծայրամասերից հենասյուներն է տեղափոխում կենտրոնական մաս, խմելու ջուր է վաճառում ու քաղաքի համայնքային բյուջեի փողերն է սեփականի պես վատնում:
Ու արմավիրցիները քաղաքապետին մի խորհուրդ են տալիս` իշխանական «դաբրոյի» փոխարեն ընտրողների «դաբրոն» պիտի ստանար:
