Ըստ ԱՄՆ դեսպանատան` ԱՄՆ փոխնախագահը ստում է

Հայաստանում ԱՄՆ դեսպանատունը երեկ բավականին ուշագրավ մի պարզաբանում է ուղարկել ԶԼՄ-ներին` օրերս համացանցում հայտնված Youtube տեսանյութի առնչությամբ, որտեղ ԱՄՆ փոխնախագահ Ջո Բայդընն ասում է, որ Սերժ Սարգսյանը իրեն խնդրել է չթեժացնել Հայոց ցեղասպանության ճանաչման գործընթացը, քանի որ ինքը հայ-թուրքական կարգավորում է սկսել:
Ստացված պարզաբանումից կարելի է ենթադրել, որ ԱՄՆ փոխնախագահ Ջո Բայդընը հայտնի տեսանյութում ԱՄՆ ընտրողների առջեւ մասնավոր զրույցում պարզապես ստում է: «Փոխնախագահը եւ նախագահ Սարգսյանը 2009 թվականի ապրիլին երկու անգամ խոսել են: Այս խոսակցությունների ընթացքում փոխնախագահը ասել է նախագահ Սարգսյանին, որ Միացյալ Նահանգները հավատում է, որ Թուրքիայի հետ հարաբերությունների կարգավորումը եւ սահմանների բացումը ճանապարհ կհարթեն Հայաստանի ավելի լավ ապագայի համար, եւ հայտնել է Միացյալ Նահանգների աջակցությունը նրա առաջնորդության համար: Փոխնախագահը հայտնել է Օբամայի վարչակազմի աջակցությունը հարաբերությունների կարգավորման ուղղությամբ առաջընթացի վերաբերյալ հայ-թուրաքական համատեղ հայտարարության մասին Շվեյցարիայի առաջարկին: Նախագահ Սարգսյանը չի խոսել նախագահ Օբամայի ապրիլ 24-յան ուղերձի բովանդակության մասին եւ չի փորձել հետաձգել Ներկայացուցիչների պալատի 252 բանաձեւի դիտարկումը: Ընդհակառակը, փոխնախագահ Բայդընի եւ նախագահ Սարգսյանի միջեւ խոսակցությունները, որոնց վերջերս անդրադարձել է փոխնախագահ Բայդընը, հայ թուրքական հարաբերությունները կարգավորելու համար անհետաձգելի քայլեր կատարելու անհրաժեշտության մասին էին: Երկու ղեկավարները համաձայնել են, որ հայ-թուրքական հարաբերությունները պետք է կարգավորվեն առանց նախապայմանների», – բառացիորեն գրված է ԱՄՆ դեսպանատան հաղորդագրության մեջ: