Այսօր լրագրողների հետ հանդիպման ժամանակ ՀՀ նախկին վարչապետ Հրանտ Բագրատյանը կրկնեց երեկ մեր կայքի հետ զրույցում հայտնած այն միտքը, թե գազի գինը չբարձրացնելը նաև «Ժամանակ» և «Հայկական ժամանակ» օրաթերթերի հրապարակումների շնորհիվ է եղել, որոնցում ցույց են տրվել «ՀայՌուսգազարդի» «մախինացիաները»:
Համեմատելով քաղաքակիրթ երկրներն ու ՀՀ-ն` Հ. Բագրատյանը նաև շեշտեց, որ ՀՀ-ում ինչպես գազի, այնպես էլ մյուս խոշոր մոնոպոլիաների մատուցած ծառայությունները պետության կողմից ճիշտ չեն կանոնակարգվում:
Այսպես՝ սպառած գազի հաշիվը մենք, ըստ Բագրատյանի, պետք է ստանանք ծրարով, իսկ գազի հաշվիչը այնպես պետք է պլոմբված լինի, որ ո՛չ սպառողը, ո՛չ էլ «ՀայՌուսգազարդի» տեսուչը չկարողանան միայնակ բացել: Այժմ տեսուչը, ըստ Հ. Բագրատյանի, կարող է գալ և հաշվիչը իր ուզած ձևով «ֆռռացնել»: «Ի՞նչ գիտեք, որ Ձեր գազի ծախսը ճիշտ են ասել, Դուք բանալին ունե՞ք»։
Նույն կերպ, ինտերնետի վարձը մուծելիս օպերատորները ցույց չեն տալիս, թե կոնկրետ որ ամսվա վճարումն է սպառողը իրականացնում: «Դուք գնում եք, ասենք, 8000 դրամ մուծում եք ինտերնետ ծառայության համար: Այդ ՀԴՄ-ի վրա չկա, թե դուք որ ամսվա համար եք վճարում: Բոլոր ինտերնետ ծառայություններ մատուցողների մոտ այդպիսի 100 վեճ է լինում օրական, ոչ ոք չի կարողանում ապացուցել հակառակը»,- ասաց Հ. Բագրատյանը:
