Փետրվարի 25-ին Վրաստանում առաջին անգամ այս տարի նշվել է որպես խորհրդային օկուպացիայի օր, գրում է Коммерсант-ը:
Պարբերականը նշում է, որ երկրի բարձրագույն ղեկավարությունը մասնակցել է սգո արարողություններին, այդ թվում ծաղիկներ են դրվել Կոջորի գյուղում խորհրդային 11-րդ բանակի հետ մարտում ընկած յունկերների հուշարձանին:
Փետրվարի 25-ը օկուպացիայի օր հայտարարելիս նախագահ Սաակաշվիլին առաջարկել էր տարելիցն անվանել «տոտալիտար ռեժիմի հիմնման, Վրաստանի անկախության կորստի ու կոմունիստական բռնաճնշումների օր, ինչի արդյունքում ոչնչացվել է ազգի սերուցքը»:
Օրվան ընդառաջ Վրաստանի դպրոցներում անցկացվել է շարադրությունների մրցույթ, որի հաղթողներին պարգևատրել է անձամբ կրթության նախարարը, ի դեպ, ազգությամբ ռուս Դմիտրի Շաշկինը:
Երկրի տարածքում բազմաթիվ փողոցներ այս տարի անվանափոխվել են ազգային գործիչների անուններով, իսկ փետրվարի 25-ին իջեցվել են բոլոր պետական հաստատություններում դրոշները:
Թբիլիսիի պետական համալսարանում կայացել է «Խորհրդային միության դատը», որը նախագահել է Վրաստանի սահմանադրական դատարանի նախագահ Գեորգի Պապուաշվիլին, իսկ դատական նիստի մասնակիցները եղել են ուսանողներ: Եվ չնայած Խորհրդային Միության «պաշտպանների» ջանքերին` դատարանը մեղադրական վճիռ է կայացրել, և Խորհրդային Միությունն ու Ռուսաստանը ճանաչվել են Վրաստանի օկուպանտներ:
