Իրանը ԽՍՀՄ-ից տարբերվում է առաջնորդների ոչ ռացիոնալ մտածողությամբ: Նման հայտարարությամբ է հանդես եկել Իսրայելի վարչապետ Բենյամին Նեթանյահուն` ամերիկյան NBC հեռուստաալիքի հետ հարցազրույցում:
Նեթանյահուն զուգահեռներ է անցկացրել երկու երկրների միջև` պատասխանելով այն հարցին, թե Իսրայելը պատրաստ կլինի՞ իրադրության, երբ Իրանը, ինչպես անցյալում ԽՍՀՄ-ը, իր տիրապետության տակ միջուկային զենք ունենա:
«Իրանական ռեժիմի համար կրոնական մոլեռանդությունը բարձր է ինքնապահպանման բնազդից, այդ իսկ պատճառով այդ երկրի ռացիոնալ գործողություններին վստահելու անհրաժեշտություն չկա»,- հայտարարել է Նեթանյահուն: Նրա խոսքով` երկիրը, որը մոլորակի տարբեր անկյուններ է ուղարկում մահապարտ ահաբեկիչների, չի կարող ռացիոնալ համարվել:
Նեթանյահուն կտրուկ քննադատության է ենթարկել իր հակառակորդներին, որոնք Իսրայելին կոչ են անում հաշտվել միջուկային Իրանի գաղափարի հետ: «Ես կարդացել եմ այն մարդկանց կարծիքները, որոնք համոզված են, որ միջուկային Իրանը Մերձավոր Արևելքում կայունություն կբերի: Այդ կերպ մտածող մարդիկ բթամտության նոր չափանիշներ են ստեղծում»,- հայտարարել է Իսրայելի վարչապետը:
Երեկ ԱՄՆ պաշտպանության նախարար Լեոն Պանետան «կարմիր գծերն» անվանել էր «քաղաքական մանիպուլյացիա», որի նպատակը ուրիշներին անկյուն քշելն է: The Foreign Policy-ի հետ հարցազրույցում նա հայտարարել էր, որ Իսրայելի, ԱՄՆ-ի կամ ցանկացած այլ երկրի կառավարությունը չպետք է իր քաղաքականությունը սահմանող «կարմիր գծեր» ունենա: Պանետանդա ասել է Իրանի հարցով Իսրայելի և ԱՄՆ-ի միջև հակասությունների ֆոնին: Իսրայելը պահանջում է մգեցնել «կարմիր գծերը», որոնց ներքո ԱՄՆ-ին պարտավորեցնում է հարձակում իրականացնել Թեհրանի միջուկային օբյեկտների դեմ: ԱՄՆ-ն, իր հերթին, համարում է, որ նման «կարմիր գծերն» արդյունավետ չեն և նույնիսկ վտանգավոր են:
