Իտալիայի առաջնության 27-րդ տուրը մեկնարկեց «Յուվենտուս»-«Բոլոնիա» խաղով: Այս մրցաշրջանում կայունությամբ աչքի չընկնող թուրինցիները հերթական անհաջող հանդիպումն անցկացրին: Եթե 26-րդ տուրում «Լեչե»-ից կրած պարտությունը հիմնականում կապված էր Բուֆոնի վաղաժամ հեռացման հետ, ապա այս խաղում կրած պարտության համար Դել Ներին ոչ մի արդարացում չուներ: 49-րդ րոպեին տանտերերի պաշտպանության կոպիտ սխալից օգտվեց «Բոլոնիա»-ի գլխավոր ռմբարկու Մարկո Դի Վայոն: 17 րոպե անց նույն Դի Վայոն կրկնապատկեց այն: Հանդիպման ավարտին դեռ բավականաչափ ժամանակ կար, բայց «Յուվենտուս»-ին այդպես էլ չհաջողվեց ոչինչ անել: Արդարության համար նշենք, որ մարզական բախտն այդ երեկո բազմիցս ժպտաց հյուրերին: «Յուվենտուս»-«Բոլոնիա»` 0:2: Եվս մեկ պարտություն և թուրինցիները վերջնականապես կզրկվեն հաջորդ մրցաշրջանում Չեմպիոնների լիգայի խաղարկության մասնակցելու իրավունքից:
«Ինտեր»-ը չափազանց կարևոր հաղթանակ տոնեց: Գլխավոր մրցակիցների խաղից առաջ Լեոնարդոյի սաները 0:2 հաշվով պարտության մատնեցին «Սամպդորիա»–ին և մրցաշարային աղյուսակում բարձրացան երկրորդ հորիզոնական: Այսօր կայանալիք «Միլան»-«Նապոլի» հանդիպումից հետո պարզ կդառնա՝ կմնա՞ն նրանք այդ դիրքում, թե՞ կնահանջեն երրորդ տեղ: Լեոնարդոն, ըստ երևույթին, կնախընտրի նահանջել, այլապես առաջատարի հետ միավորների տարբերությունը չի կրճատվի:
Չի կարելի չնշել նաև «Պալերմո»-ի խայտառակ պարտությունը: Դելիո Ռոսսիի սաները Սիցիլիայում 7 անպատասխան գնդակ ընդունեցին «Ուդինեզե»-ից: Պոկերի հեղինակ դարձավ Սանչեսը, ևս 3 գոլ հեղինակեց Դի Նատալեն: Հանդիպումից հետո ակումբի նախագահ Մաուրիցիո Ձամպերինին հայտարարեց, որ Դելիո Ռոսսիի աշխատանքը շարունակելու հավանականությունը ընդամենը 1 տոկոս է:
Մյուս հանդիպումներում գրանցվեցին հետևյալ արդյունքները.
«Կատանիա» – «Ջենոա»` 2:1
«Բրեշիա» – «Լեչե»` 2:2
«Ռոմա» – «Պարմա»` 2:2
«Կալյարի» – «Լացիո»` 1:0
«Բարի» – «Ֆիորենտինա»` 1:1
«Չեզենա» – «Կևո»` 1:0: