ՄԱԿ-ի Անվտանգության խորհուրդը դատապարտել է մուսուլմանական երկրներում արևմտյան մի շարք երկրների դիվանագիտական առաքելությունների վրա հարձակումները: Հարկ է նշել, որ անկարգությունների առիթ համարվող սկանդալային «Մուսուլմանների անմեղությունը» ֆիլմին ԱԽ-ն դարձյալ չի արձագանքել:
«Անվտանգության խորհրդի անդամները կոչ են արել այդ բոլոր երկրներին պաշտպանել դիվանագիտական ներկայացուցիչների և հյուպատոսությունների սեփականությունը, նրանց աշխատակիցներին, ինչպես որ դա պահանջում են միջազգային նորմերը»,- ասվում է ՄԱԿ-ի ԱԽ-ն սեպտեմբերին նախագահող Գերմանիայի մշտական ներկայացուցիչ Փեթեր Ուիթիգի ուրբաթ օրը ընթերցած հայտարարության մեջ:
Ինչպես հաղորդում է ITAR-TASS-ը, ՄԱԿ-ի ԱԽ անդամները հիշեցրել են, որ «դիվանագիտական և հյուպատոսական օբյեկտների անձեռնմխելիության հիմնական սկզբունքը» ամրագրված է 1961թ. Դիվանագիտական հարաբերությունների մասին Վիեննայի կոնվենցիայով և 1963թ. Հյուպատոսական հարաբերությունների մասին Վիեննայի կոնվենցիայով: Հայտարարության մեջ շեշտադրվում է, որ այդ փաստաթղթերը պարտավորեցնում են երկրներին «բոլոր պատշաճ միջոցները ձեռնարկել՝ դիվանագիտական և հյուպատոսական օբյեկտները ցանկացած չարտոնված ներխուժումից կամ վնասից պաշտպանելու համար, ինչպես նաև կանխել դրանց տարածքում հասարակական կարգի խախտումը և աշխատակիցներ արժանապատվության վիրավորումը»:
Հիշեցնենք, որ ավելի վաղ ՄԱԿ-ի ԱԽ-ն նմանատիպ հայտարարությամբ հանդես էր եկել՝ դատապարտելով կոնկրետ հարձակում՝ Լիբիայի Բենղազի քաղաքում ԱՄՆ հյուպատոսության վրա հարձակումը և այդ երկրում ԱՄՆ դեսպանի սպանությունը: Երկու հայտարարություններում էլ խոսք չկա մուսուլմանների հուզումների համար առիթ հանդիսացած «Մուսուլմանների անմեղությունը» ֆիլմի վերաբերյալ:
