«Արևմտյան Հայաստանի հարավում մեծապես իշխում է քրդական տարրը: Այն քաղաքները, որտեղ կա քրդական հոծ բնակչություն,ռազմական միջավայր են հիշեցնում»,- այսօր լրագրողների հետ հանդիպմանը հայտնեց ՌԱՀՀԿ փորձագետ Սարո Սարոյանը:
Նրա խոսքով՝ այդ քաղաքներում հիմնված է ռազմական բազա. «Ավտոմատներով կանգնած են, որպեսզի առաջին իսկ հնարավորության դեպքում դիմեն զենքի: Վախը,թե քրդական տարրը կարող է ոտքի կանգնել և քաղաքական խնդիրներ առաջ քաշել, շատ մեծ է»:
Փորձագետը նշեց նաև, որ Արևմտյան Հայաստանում աչքի է զարնում թուրքական ժանդարմերիայի ներկայությունը, որը հասարակությանը անընդհատ փորձում է բռի մեջ պահել. «Հայությունը որոշակի զարթոնք է ապրում Մուշ և Սասուն քաղաքներում: Նրանք կարողանում են իրենց ինքնությունը բացահայտել՝ չնայած իսլամադավան են և հայերեն չգիտեն` խոսում են քրդերեն և թուրքերեն: Նրանց հետ անհրաժեշտ է մեծ աշխատանք տանել, որպեսզի կապ հաստատվի հայրենքի հետ»:
Այնտեղի հայերի խոսքերով՝իրենք իսլամը ստիպողաբար չեն ընդունել:Գուցե իրենց պապերը դա արել են ստիպողաբար, բայց իրենք՝ ոչ:
Խոսելով Սիրիայում տեղի ունեցող դեպքերի մասին` փորձագետը նշեց. «Այսօր Թուրքիան`կապված Սիրիայի դեպքերի հետ, մեծ քննություն է հանձնում, և եթե Ասադի ռեժիմը կարողանա պահպանել իր գերիշխող դիրքը, ապա Թուրքիային լավ օրեր չեն սպասվում: Դա դուռ կբացի քրդական քաղաքական շարժումների համար բուն Թուրքիայում: Իրենց հույսը Ասադի ռեժիմի տապալումն է»:
«Այսօր Արևմտյան Հայաստանը բաժանված էերկու մասի՝ հյուսիսային և հարավային: Հյուսիսային մասում Թուրքիան է վերահսկում: Իգդիրը բնակեցված է ադրբեջանցիներով: Հարավում քրդական տարրը կարողանում է դիմագրավել իշխանություններին:Նրանց չեն վախեցնում այնպիսի գործողությունները,ինչպիսին է, օրինակ, Վանի քաղաքապետի ձերբակալությունը:Այս նոր իրավիճակը խորհելու տեղիք է տալիս: Հյուսիս-հարավ հակամարտությունը ծնում է հայ ժողովրդի և հայոց պետության դերակատարության խնդիր»,- ասաց Սարոյանը:
