Թուրքական Habertürk թերթի փոխանցմամբ՝ Թուրքիայի էներգետիկայի և բնական պաշարների նախարար Թաներ Յըլդըզը հայտարարել է, որ Անկարան շահագրգռված է թուրքմենական գազը գնելու հարցում: Յըլդըզը հավելել է, որ Թուրքիայի էներգետիկ քաղաքականությունը զարգանում է, և Անկարան կարող է շահավետ գնորդ հանդիսանալ Աշխաբադի համար:
Թուրքմենստանի նավթագազային արդյունաբերության զարգացման ծրագրին համապատասխան՝ պլանավորված է 2030 թվականին գազի տարեկան արդյունահանումը հասցնել մինչև 230 միլիարդ խորանարդ մետրի, որի մեծ մասը նախատեսված է արտահանման համար:
BP-ի հաշվարկներով՝ Թուրքմենստանը բնական գազի պաշարներով աշխարհում զբաղեցնում է չորրորդ տեղը՝ Ռուսաստանից, Իրանից և Կատարից հետո: Ներկայիս դրությամբ, Թուրքմենստանն իր գազն արտահանում է դեպի Չինաստան, Իրան և Ռուսաստան:
