«Ժառանգություն» կուսակցության ղեկավար Րաֆֆի Հովհաննիսյանը մամուլի ասուլիսում հույս հայտնեց, որ ամենաուշը դեկտեմբերի 9-ին Ազգային ժողովում կկայանա Լեռնային Ղարաբաղի ճանաչմանը վերաբերող օրինագծի քվեարկությունը, եւ մեծամասնությունը կողմ կքվեարկի այդ համազգային նշանակություն ունեցող օրինագծին: Նա կարծում է, որ միայն այդ ժամանակ մենք կվաստակենք միջազգային հանրության զորակցությունը: Նա հիշեցրեց, որ ԱԺ քաղաքական մեծամասնությունը չէր ցանկացել, որ այդ հարցը մտնի մեծ օրակարգ: ՀՀ առաջին արտգործնախարարը լրագրողներին տեղեկացրեց նաեւ, որ Հայաստանի անկախության առաջին տարիներին չի եղել դիվանագիտական որեւէ հանդիպում, որի ժամանակ չքննարկվեր Լեռնային Ղարաբաղի ճանաչման, նրա ինքնիշխանության հրամայականը: Նա հիշեց, որ տարբեր երկրներ այն ժամանակ հետաքրքրվել են, թե ինչու Հայաստանը չի ճանաչում ԼՂ անկախությունը: «Ժառանգության» ղեկավարը հիշեց նաեւ, որ Հայաստանի երեք նախագահները տարբեր ժամանակներում տարբեր ամբիոններից բարձրաձայնել են ԼՂ ճանաչման անհրաժեշտության մասին, սակայն միաժամանակ ասել են, որ դրա ժամանակը չէ: Համեմատելով Կոսովոյի ճանաչման հետ` «Ժառանգության» ղեկավարը նշեց, թե մենք չպետք է սպասենք, որ միջազգային հանրությունը ճանաչի ԼՂ անկախությունը: Նրա կարծիքով , պետք է ներքին կյանքում էլ լինեն փոփոխություններ, եւ դրանք պետք է կապված լինեն քաղաքացիական ազատությունների, քաղբանտարկյալների ազատ արձակման հետ: «Ոչ թե պետք է գնալ միակողմանի արկածախնդրությունների, ինչպիսիք էին հայ-թուրքական արձանագրությունները, այլ ցույց տալ, որ մեր միտքը, խոսքը եւ գործը համապատասխանում են»,- ասաց նա: Անդրադառնալով անկախության տարիներին ՀՀ-ի արտաքին քաղաքականությանը` նա նշեց, որ Հայաստանը միշտ ակնկալել է նվազագույն շահ եւ ցուցաբերել զգուշավորություն: Մինչդեռ Ր. Հովհաննիսյանի դիտարկմամբ` ագրեսոր պետությունը միջազգային բոլոր ամբիոններն օգտագործում է իր քաղաքական շահն առաջ մղելու համար` փորձելով ցույց տալ, որ ինքն է զոհը եւ իրավազրկվածը: Րաֆֆի Հովհաննիսյանը կարծում է, որ Հայաստանը կշահի, եթե միաձայն կողմ քվեարկի ԼՂ ճանաչման օրինագծին: «Դա ցույց կտա, որ Արցախի ճանաչումը մեր պետական օրակարգում է»,- ասաց նա:
