«Ազգային ինքնորոշում միավորում» կուսակցությունը մասնակցելու է 2012թ. խորհրդարանական ընտրություններին:
Լրագրողների հետ հանդիպման ժամանակ Հայրիկյանը տեղեկացրեց, որ նախապատրաստական աշխատանքներն արդեն սկսվել են` կուսակցությունը դիմել է իր բոլոր անդամներին և համակիրներին` կոչ անելով մասնակցել քաղաքական ուժի գործունեության սատարելուն ուղղված հանգանակությանը:
Հայրիկյանը նշեց, որ նվազագույն անհրաժեշտ դրամագլխի ապահովումը, որով կվերսկսվեն ԱԻՄ-ի երևանյան և մարզային գրսասենյակների աշխատանքները, կվկայեն նաև այն մասին, որ հասարակությունը պատրաստ է սատարել երկրում իրավիճակն արմատափոխելուն ուղղված ԱԻՄ ծրագրին:
Այդուամենայնիվ, Հայրիկյանը նշեց, որ ընտրություններին միայնակ գնալը անիմաստ է համարում, և իրենք պատրաստ են համագործակցել բոլոր առողջ ուժերի հետ:
Հարցին, թե համամի՞տ է ՀԱԿ-ի այն դիտարկման հետ, որ այժմ ամենադոմինանտ ընդդիմադիր ուժն իրենք են, և արդյոք հնարավո՞ր է, որ ԱԻՄ-ը միանա ՀԱԿ-ին, Հայրիկյանը պատասխանեց. «ՀԱԿ-ը չի ստում, որ ինքն այսօր դոմինանտ է ընդդիմադիր դաշտում, քանզի իրենք ամենամիավորված ուժն են, բայց եթե ՀԱԿ-ի ծրագրերում մենք տեսնեինք այնպիսի կետեր, որոնք մեզ համար ընդունելի են, կմիավորվեինք»:
Հայրիկյանը նաև նշեց, որ ինքն իրեն հարգելով, չի միանա ծանրագույն սխալներ կատարած այն ուժի հետ, որը հայտարարում է, թե իր գործած միակ սխալը Ռոբերտ Քոչարյանին Հայաստան բերելն էր: