Այս տարի 100-իցավելի սիրիահայաշակերտներ ուսումնական տարին դիմավորեցին Խաչիկ Դաշտենցի անվան թիվ 114 դպրոցում: Թեև դպրոցի տնօրեն Ռուզաննա Կոստանյանը սկզբում ասել է, թե սիրիահայերի համար ամեն ինչ անվճար է, սակայն ծնողական ժողովին ծնողներն անակնկալի են եկել.նրանցից պահանջվել է ամսական վճարել 15.000 դրամ՝ ֆոնդի, գրքի, հավաքարարի, կավիճի և այլնի համար, ինչը մեծ դժգոհություն է առաջացրել սիրիահայերի շրջանում: Նրանք այժմ արդեն փոշմանել են, որ այս դպրոցն են դիմել`ուսանելու:
Մանկավարժների վերաբերմունքից շատ գոհ են, ասում են` շատ հոգատար են սիրիահայ աշակերտների նկատմամբ, միայն մտածում են՝ թանկ հաճույք է այս դպրոցում սովորելը. եթե ընտանիքում երեք աշակերտ կա, ապա ամսական իրենց 45 հազար է անհրաժեշտ դպրոցի կարիքները հոգալու համար:
Սփյուռքի նախարարությունում սիրիահայերի հարցերով ձևավորված հանձնաժողովի նախագահ Ֆիրդուս Զաքարյանը «Առաջին լրատվական»-ի հետ զրույցում նշեց, որ Երևանի դպրոցներից մեկում սիրիական ծրագրով դպրոց են բացում, երեխաներին տեղափոխելու են այնտեղ: Նա նշեց, որ սիրիահայերի համար դպրոցում ամեն ինչ անվճար է:
«Եթե որևէ դպրոց նման բան է թույլ տվել իրեն, մեր վերաբերմունքն, իհարկե, բացասական է. ինչպե՞ս կարելի է նման բան, որևէ վճար նրանցից չպետք է վերցնել, նրանց ուսուցումը պետք է տարվի անվճար հանրակրթական դպրոցում, և չեմ կարծում` որևէ մեկը սա չգիտի և պետք է կարգ խախտի»,-ասաց Ֆիրդուս Զաքարյանը:
Կրթության և գիտության նախարարության հանրակրթության վարչության պետ Նարինե Հովհաննիսյանն էլ, խնդրին ծանոթանալով, անմիջապես դպրոցի տնօրենի հետ էր խոսել: Ռուզաննա Կոստանյանը հերքել է 15.000 դրամ հավաքելու վերաբերյալ բոլոր խոսակցությունները, խոստացել նորից ժողով հրավիրել և հայտարարել է, որ դպրոցում ամեն ինչ անվճար է:
Իսկ դասագրքերն արդյոք վարձույթո՞վ, թե՞ անվճար կտրամադրվեն սիրիահայերին: Նարինե Հովհաննիսյանի խոսքով` ինչ-որ մի տոկոս կա, որ դպրոցը կարող է սոցիալապես անապահով երեխաներին դասագրքերն անվճար տրամադրել, իսկ սիրիահայերից հավանաբար գումար չեն գանձի դասագրքերի տրամադրման դիմաց: Նա ավելացրեց, որ սիրիահայերի դասագրքերի՝ անվճար տրամադրման շուրջ քննարկում կլինի, և դպրոցի տնօրենը կխոսի հիմնադրամի հետ:
