Հիմա հերթը ընդդիմությանն է: «Առաջին լրատվական»-ի զրուցակիցն է ԱԺ պատգամավոր Ստեփան Սաֆարյանը:
– Այս իրավիճակը տարօրինակ է ու աբսուրդային: Եթե ցանկությունը հանրահավաքում միասին հարթակին կանգնելն է, ապա դա չի կարող բավարարել բոլորիս կողմից առանձին-առանձին հռչակված իշխանափոխության հրամայականը: Պետք է ինքնանպատակ դարձնել ոչ թե հարթակում միասին կանգնելը, այլ այն գործողությունները, որ պետք է համաձայնեցնենք միմյանց հետ, դրանց համար կրենք պատասխանատվություն, ներդնենք մեր բոլոր ռեսուրսները՝ դրանց իրականացման համար և հասնենք հաղթանակի:
– Որքանո՞վ է իրականանալի Ձեր ասածը:
– Բազմաթիվ երկրներում իրականացվել է: Եթե ուզում ենք ապացուցել, որ մենք ապաշնորհ ենք, ուրիշ խնդիր է:
– Այսինքն՝ պարտադիր չեք համարում ինչ-որ ֆորմատ ստեղծելը, այլ՝ կարևորը՝ գործողությունները ընդհանուր լինեն:
– Հո կոալիցիա չենք ստեղծելու, ընդդիմադիր բուրգ չենք ստեղծելու նրանց նման: Ավելի կարևոր է՝ իմանալ ինչ ենք անում միասին, այլ ոչ թե ինչ-որ մի խումբ որոշի ինչ է անում և մյուսներին ասի՝ գնանք անելու: Եթե գործողություն ենք անում, ապա գործողությունների ծրագիրը պետք է համաձանեցվի, օրակարգը ճշգրտվի, միասնաբար սահմանվի, պատասխանատվությունն ու ռեսուրսները կրենք միասին:
– «Ժառանգությունն» ու Կոնգրեսը իրար հետ համագործակցության փորձ ունեն, նաև՝ «Ժառանգությունն» ու ՀՅԴ-ն: Հաշվի առնելով նրանց հետ համագործակցության Ձեր փորձը` հնարավոր համարո՞ւմ եք Ձեր ասած տարբերակը:
– Իհարկե, հնարավոր է: Առնվազն երկու առանցքներով ունենք ինչ-որ խնդիրների շուրջ համագործակցության փորձ: Եվ եթե խոսք է գնում եռագագաթ համագործակցության մասին, ապա պետք է կայանա Կոնգրես-ՀԴՅ առանցքը: «Ժառանգությունը» բազմիցս է փորձել կամրջել առանցքը: Ուստի, եթե անգամ «Ժառանգության» միջնորդությունն անընդունելի է, ապա այդ երկու ուժերը իրենք պետք է սեփական նախաձեռնությամբ կարգավորեն խնդիրը: Ահա դա հեշտացնելու համար «Ժառանգությունը» բազմիցս առաջարկել է կազմել, ձևավորել առանցքը:
– Ձեր կարծիքով՝ կստացվի՞, արդյոք, կամրջելը:
– Մենք շատ ենք սիրում ասել, թե իշխանությունները քաղաքական կամք չունեն արդար ընտրություններ անցկացնելու: Հիմա ընդդիմությունն ինքն իրեն ձեռնոց է նետել. քաղաքական կամք ունի՞, արդյոք, այդ բանն անելու:
– Իսկ ի՞նչ կլինի, եթե միավորում չկայանա:
– Վստահ եմ` յուրաքանչյուրս առանձին-առանձին ի զորու ենք հաղթահարել խորհրդարանական արգելքը: Բայց եթե մենք բավարարվելու ենք փոքրիկ հաղթանակներով, ուրիշ խնդիր է: Իսկ եթե մեր նպատակն է իշխանափոխությունը, համակարգափոխությունը, ապա պետք է գնանք միավորման:
– Կխնդրեի մեկնաբանել նաև Ձեր խմբակցության պատգամավոր Զարուհի Փոստանջյանի եղբոր դեմ հարուցված քրեական գործը. արդյո՞ք սա քաղաքական հետապնդում է:
– Ամեն րոպեն, ամեն ժամը ապացուցելու են գալիս, որ Տիգրան Փոստանջյանը պատանդ է վերցված` իշխանության բարձրագույն ատյանների հրահանգով, և ամեն ինչ արվում է նրա գլխին քրեական օրենսգրքի հնարավորինս շատ հոդվածներ լցնելու համար: Հետապնդած նպատակների վերաբերյալ կարող եմ ենթադրություններ անել` սկսած նրանից, որ փորձեն «Ժառանգությանը», Զարուհուն ետ պահել քաղաքական, քաղաքացիական ակտիվությունից, նաև, որ «Ժառանգությանը» ետ պահեն քաղաքական, քաղաքացիական ակտիվությունից, որ նա իր ժամանակի մի հատվածը նվիրի Տիգրան Փոստանջյանի` ամեն վայրկյան խախտվող իրավունքների պաշտպանությանը: Տիգրան Փոստանջյանի դեմ իրականացվողն ընկալում ենք որպես հասարակության, մեր դեմ ուղղված: Փորձելու ենք անել ամեն ինչ` նրան ԱԱԾ ճիրաններից ազատ արձակելու համար:
Լուսանկարը` PanArmenianPhoto-ի
