Հ այաստանի ազգային անվտանգության ծառայությունը առաջարկել է թուրքական «Հզոր Թուրքիա» կուսակցության նախագահ Թունա Բեկլեւիչին եւ փոխնախագահ Բայբարս Օրսեքին «լքել Հայաստանի տարածքը». նրանք արդեն ճանապարհին են: ԱԱԾ-ի մամուլի կենտրոնից «Ազատություն» ռադիոկայանին տեղեկացրել են, որ «Հզոր Թուրքիա»-ի ղեկավարները հրավիրվել են Ազգային անվտանգության ծառայության վարչական շենք` հայ-թուրքական սահմանը ապօրինի հատելու մասին իրենց հայտարարությունների առնչությամբ պարզաբանումներ տալու նպատակով: «Նրանք հայ-թուրքական սահմանը հատելու վերաբերյալ որեւէ հիմնավոր փաստարկ չկարողացան ներկացնել: Նախազգուշացվել են, որ նման վարքագիծը անընդունելի է», – փոխանցեցին ԱԱԾ-ից:
Ի դեպ` սահմանը ապօրինի հատելու մասին հայտարարությունների առնչությամբ Հայաստանի ազգային անվտանգության ծառայությունը եւ Ռուսաստանի Անվտանգության դաշնային ծառայության սահմանապահ վարչությունից ձեռնարկել են համապատասխան միջոցառումներ, որոնց արդյունքում, ԱԱԾ-ի փոխանցմամբ, «Հզոր Թուրքիա» կուսակցության ղեկավարների հայտարարությունները չեն հաստատվել:
Հիշեցնենք, որ Բեկլեւիչի գլխավորած «Հզոր Թուրքիա» կուսակցությունը Թուրքիայի ամենաերիտասարդ, նորաստեղծ կուսակցությունն է: Այսօր Երեւանում ԱԱԾ-ի կողմից նրան բերման ենթարկելու փաստը Թուրքիայում կարող է մեծապես նպաստել այս կուսակցության հեղինակության բարձրացմանը 2011 թվականի հուլիսին կայանալիք խորհրդարանական ընտրություններից առաջ:
