Կենտրոն եւ Նորք-Մարաշ վարչական շրջանների առաջին ատյանի դատարանը` նախագահությամբ Մնացական Մարտիրոսյանի, Արտյոմ Աբրահամյանին դատապարտեց 6 տարվա ազատազրկման: Հիշեցնենք, որ նա «Վաղարշ եւ որդիներ» (ոսկու շուկայի) ընկերության տնօրեն Վաղարշ Աբրահամյանի որդին է եւ կալանավորված է 2009 թվականի փետրվարի 14-ին Ադոնցի փողոցում տեղի ունեցած ծեծկռտուքի կապակցությամբ. նա մեղադրվում է զենքի գործադրմամբ խուլիգանություն անելու, դիտավորությամբ առողջությանը ծանր վնաս պատճառելու, ապօրինի զենք կրելու, կիրառելու մեջ: Առաջադրված մեղադրանքներում նա իրեն լիովին մեղավոր էր ճանաչել: Վեճի պատճառն, իբր, Աբրահամյաններից մեկի ավտոմեքենայի վրա «թքելն էր», ինչը հետո վերածվել էր հանցագործության: Կողմերը ժամադրվել էին Երեւանի Կենտրոնում` «Հին Էրիվան» ռեստորանի մոտ, սկզբում փորձել փոխըմբռնման գալ, սակայն այն անհաջող ավարտ էր ունեցել. ամբաստանյալ Արտյոմի խոսքով, ինքը, տեսնելով, որ եղբորը` Արթուրին, խփում են, մի անգամ օդ է կրակել, հետո երկու անգամ` եղբորը խփողների ուղղությամբ, որից մեկը դիպել էր Արտյոմ Բաղյանին, մյուսը` Պավել Խաչատրյանին: Դեպքից անմիջապես հետո Արտյոմ Աբրահամյանը մեկնել էր երկրից, հայտնաբերվել Կիեւում եւ բերման ենթարկվել Հայաստան: Տուժողներից Պավել Խաչատրյանն ընտանիքով ՌԴ-ում է, իսկ երկրորդ տուժողը, որը նաեւ որպես մեղադրյալ էր ներգրավված եղել, պարտքուպահանջ չուներ Աբրահամյաններից. նրա բուժման ծախսերը հոգացել էին, իսկ մեղադրանքի մասը կարճվել էր, քանի որ նա մարմնական վնասվածքներից եւ վիրահատությունից հետո դադարել էր հանրության համար վտանգ ներկայացնելուց: Այս գործից մի քանի մասեր են անջատվել առանձին վարույթ, մի մասը կարճվել էր, իսկ մեղադրյալներից Սերգեյ Մնացականյանը դեռ հետախուզման մեջ է:
