Մեծ Բրիտանիայի միջազգային հարաբերությունների «Չաթոմ Հաուզ» թագավորական ինստիտուտի փորձագետ Ջեյմս Նիկսիի գնահատմամբ, ղարաբաղյան հակամարտությանը Արևմուտքում քիչ են ծանոթ` բացառությամբ փորձագետների, որոնք անմիջականորեն զբաղվում են այդ հարցով:
«Առաջին լրատվականի» հետ զրույցում Նիկսին նշեց, որ Մինսկի գործընթացը գրեթե մահացած է, և ավելի լավ կլիներ, որ Եվրամիությունն ավելի ակտիվ ներգրավվեր այս գործընթացում:
Նրա գնահատմամբ, ղարաբաղյան հակամարտության կարգավորման համար անհրաժեշտ է, որպեսզի երկու կողմերն էլ ցանկանան տեսնել կոնֆլիկտի ավարտը և սեփական գործողություններին ինքնաքննադատությամբ վերաբերվեն, քանզի երկու կողմերն էլ մեղքի իրենց բաժինն ունեն:
«Ես գիտեմ, որ կա ՄԱԿ-ի բանաձև որտեղ ասվում է, որ ԼՂ-ն ադրբեջանական տարածք է, սակայն նաև փաստ է այն, որ Հայաստանը պատմականորեն կապված է այդ տարածքի հետ: Այսինքն` հակամարտության երկու կողմերն էլ փաստարկներ ունեն և պետք է դրանք հաշվի առնեն ու գան համաձայնության»,- ասաց փորձագետը:
Նիկսիի խոսքերով, Արևմուտքը չի կարող կողմերի փոխարեն որոշումներ ընդունել և դա պետք է անեն հենց իրենք` կողմերը:
