Ադրբեջանի իշխող «Ենի Ազերբայջան» կուսակցությունն, առանց որեւէ բացատրության, հրաժարվել է առաջիկա խորհրդարանական ընտրությունների նախընտրական քարոզարշավի փուլում մեծ միտինգներ անցկացնելուց: Տեղեկացնելով այդ մասին` «Ազադլըգը» հայտնում է, որ իշխող կուսակցությունը Բաքվի կենտրոնում իր վերջին միտինգն անցկացրել է նախագահական ընտրությունների նախնական արդյունքները հայտնելուց անմիջապես հետո, որի ժամանակ, չնայած բոլոր վարչական ռեսուրսների օգտագործմանը, ակցիային մարդկային մեծ զանգվածներ չեն մասնակցել, և միտինգն էլ շատ դժգույն է անցել: «Երեւում է` հերթական անգամ իշխանական կուսակցությունը չի ցանկանում խայտառակվել»,- գրել է թերթը: Ադրբեջանի ժողճակատ կուսակցության փոխնախագահ Նուրեդդին Մեմմեդլին կարծում է, որ «աբսուրդ կլիներ, եթե իրեն հարգող մարդը արձագանքեր ներկայումս վարկաբեկված իշխող կուսակցության կոչերին»:
«Միջազգային ազդեցիկ Gallup կազմակերպության` ամենաժամանակակից տեխնոլոգիաների վրա հիմնված հարցումների համաձայն` Ադրբեջանում բնակչության 60 տոկոսից ավելին օրերով սննդի փող չի կարողանում հայթայթել: Նման երկրում անհնարին է մի տեղ հավաքելով ողորմելի վիճակի մեջ գցած քաղաքացիներին` հաջողության հասնել»,- ասել է նա: Ն.Մեմմեդլիի կարծիքով, իշխող կուսակցությունը հրաժարվել է զանգվածային միջոցառումներից` հասկանալով երկրի այսօրվա վիճակը: «Ընդդիմությանը միտինգների հնարավորություն չեն տալիս, իրենք էլ չունեն դրա հնարավորությունը,- փաստել է նա: Իշխող կուսակցությունը պասիվություն է ցուցաբերում նաեւ հեռուստատեսային քարոզչության հարցում: Չէ՞ որ ժողովրդի ատելությանը եւ բացասական վերաբերմունքին արժանացած կուսակցության թեկնածուների ելույթները կարող են ավելի գրգռել հասարակությանը եւ ավելի վատացնել իշխանության նկատմամբ նրա վերաբերմունքը»,- եզրահանգել է Ժողճակատի փոխնախագահը:
