Օրենքի դեմ հանրային բողոքները ցույց տվեցին, որ կառավարությունը դժվարությամբ, բայց այնուամենայնիվ արձագանքում է հասարակության ձայնին:
Նման եզրակացության են եկել Քաղաքացիական հասարակության համագործակցության ցանցը և Օքսֆամ միջազգային բարեգործական ընկերությունը «Ժամանակավոր անաշխատունակության նպաստների մասին» օրենքի պատճառով ստեղծված աղմուկից հետո:
Կազմակերպությունների ներկայացուցիչները լրագրողների հետ հանդիպման ժամանակ նշեցին, որ կարևոր առաջընթաց է օրենքում կատարված դրական փոփոխությունը` միևնույն ժամանակ մատնանշելով խնդրահարույց դրույթները:
«Օրենքում դեռ կան դրույթներ, որոնք մտահոգիչ են: Դրանցից մեկն այն է, որ ժամանակավոր անաշխատունակության բոլոր նպաստները հարկվելու են, և մյուսը այն, որ հղիության և ծննդաբերության անաշխատունակության դեպքերից բացի, մյուս բոլոր դեպքերի նպաստների համար պահպանվում է փոխհատուցման նվազագույն շեմը»,- ասաց անաշխատունակ ճանաչված անձանց իրավունքերի պաշտպանության քաղաքացիական նախաձեռնության անդամ Տաթևիկ Դավթյանը: