ԱԺ այսօրվա նիստում անդրադառնալով պատգամավորների՝ մեկից ավելի հանձնաժողովներում ընդգրկված լինելու հարցի հետ կապված անհարմարություններին՝ ՀՅԴ պատգամավոր Արծվիկ Մինասյանը նշեց, որ երեք խմբակցությունները՝ ՀՅԴ-ն, ՀԱԿ-ն ու «Ժառանգությունը», որոնց վրա էլ առաջին հերթին կանդրադառնա օրենսդրական փոփոխությունը, հանդես են գալու իրենց առաջարկություններով, քանի որ հեղինակած օրինագիծը որոշ թերություններ ունի:
«Բոլոր հանձնաժողովների նիստերը գումարվում են գրեթե նույն ժամին` 11-ին, այսինքն` եթե փոփոխությունը կատարվի և նույն պատգամավորը հնարավորություն ունենա մինչև երեք հանձնաժողովների անդամ հանդիսանալ, անգամ ամենամեծ ցանկության դեպքում էլ այդ անձը չի հասցնի մասնակցել բոլոր նիստերին»,- ասաց նա:
Ա.Մինասյանը հորդորեց գործընթացն այնպես կազմակերպել, որպեսզի չստացվի, թե մեծամասնության պատգամավորները ավելի մեծ լիազորություններ ունեն, քան փոքրաթիվ խմբակցությունների պատգամավորները:
«Այսօր ոչ մի մեծամասնության պատգամավոր ավելի լիազորություն չունի, քան ունեն փոքրաթիվ խմբակցությունների պատգամավորները: Եվ ես` մենք ամեն ինչ անելու ենք, որ արդյունավետ աշխատենք միասին»,- արձագանքելով ՀՅԴ պատգամավորին՝ իր հերթին հավաստիացրեց ԱԺ նախագահ Հովիկ Աբրահամյանը:
