2008 թվականի մարտիմեկյան իրադարձությունների հետևանքով անազատության մեջ գտնվող Ռոման Մնացականյանը հացադուլ է հայտարարել «Վանաձոր» քրեակատարողական հիմնարկում:
Քաղբանտարկյալների ու հալածյալների պաշտպանության կոմիտեի ներկայացուցիչ, իրավապաշտպան Վարդան Հարությունյանը «Առաջին լրատվական»-ի հետ զրույցում նշեց, որ Մնացականյանը հայտարարել է անժամկետ հացադուլ:
«Նա պետք է վաղուց համաներված լիներ, բայց նրան ազատ չարձակեցին, թեև նրա պատժի 2/3-րդն արդեն անցել է, և պետք է ազատ արձակեին: Բնականաբար, այդ պատճառով նա վրդովված է և հացադուլ է հայտարարել»,- տեղեկացրեց Հարությունյանը և հավելեց, որ Մնացականյանի ռեժիմը խստացրել են և տեղափոխել «Վանաձոր» քրեակատարողական փակ հիմնարկ:
Հիշեցնենք, որ Ռոման Մնացականյանը ի սկզբանե իր պատիժը կրում էր «Էրեբունի» քրեակատարողական հիմնարկում, բայց շուրջ 6 ամիս առաջ, կարգապահական տույժի ենթարկելով, նրան Վանաձորի փակ կալանավայր են տեղափոխել:
Հացադուլ հայտարարած քաղբանտարկյալն այժմ պահանջում է, որպեսզի նրան նորից տանեն «Էրեբունի» ՔԿՀ:
Վարդան Հարությունյանը տեղեկացրեց, որ Վանաձորի ՔԿՀ-ում Մնացականյանը պահվում է շատ խիստ պայմաններում, և հարազատները նրան տեսնելու հնարավորություն չունեն:
ՔԿՀ-ից նշում են, թե Մնացականյանի ռեժիմի խստացման հիմնական պատճառն այն է, որ նա ժամանակին խախտումներ է թույլ տվել, հեռախոսային խոսակցություններ է ունեցել և դրանց համար տույժեր է ստացել:
«Վստահ կարող եմ ասել, որ դրանք այնպիսի կոպիտ խախտումներ չեն, որի համար մարդու ռեժիմը կարելի է խստացնել, այն էլ՝ քաղբանտարկյալի ռեժիմը, որը ոչ մի հանցանք չի գործել և բանտում չպիտի լիներ»,- շեշտեց իրավապաշտպանը:
Վարդան Հարությունըյանը նշեց, որ այս ամենի մեջ ակնհայտ միտում կա. «Ռոման Մնացականյանի նկատմամբ իշխանությունները կալանավայրի ղեկավարության ձեռքով հաշվեհարդար են իրականացնում, այդ երիտասարդին ցանկացած հնարավոր ճանապարհով ճնշում են, նույնիսկ նրա նկատմամբ համաներումը չկիրառեցին»:
Հարությունյանի գնահատմամբ, Մնացականյանի վրա իշխանությունները ճնշումներ են գործադրում, քանի որ վերջինս չի ենթարկվում, խոստովանություն չի գրում, մնում է հավատարիմ իր հայացքներին: