Բռնցքամարտի ծանր քաշային կարգի WBC վարկածով աշխարհի չեմպիոն Վիտալի Կլիչկոն մեկնաբանել է իր և գերմանացի Մանուել Չարի՝ այսօր առավոտյան տեղի ունեցած մենամարտը՝ ընդգծելով, որ բնական է, որ Չարը պատասխան առճակատում է պահանջում:
Հիշեցնենք, որ Վիտալին հաղթանակ տարավ Չարի հանդեպ: Մարտի մրցավարը չորրորդ ռաունդում Չարի՝ խոր բացված վնասվածքի պատճառով դադարեցրեց հետագա պայքարը՝ հաղթանակը շնորհելով ուկրաինացի բռնցքամարտիկ Վիտալի Կլիչկոյին:
«Շատ ուրախ եմ, որ ինձ հաջողվեց պաշտպանել չեմպիոնական գոտիս: Ցավոք, այդ պայքարը չավարտվեց այնպես, ինչպես մենք ցանկանում էինք: Մրցավարը պայքարն ավարտելու որոշում կայացրեց՝ մտածելով Չարի առողջական վիճակի մասին: Կարող եմ ասել, որ Չարը միանշանակ լուրջ մրցակից է, նա մարտիկ է՝ մեծ սրտով: Չարն սկզբում շատ լավ էր պաշտպանվում, սակայն հետո սկսեց սխալներ թույլ տալ՝ ինձ առաջ մղվելու հնարավորություն ընձեռելով: Երբ մրցակիցը պաշտպանվում է՝ հեռու պահելով քեզ իրենից, շատ բարդ է կոտրել այդ պաշտպանությունը: Հանդիսատեսը, իհարկե, ցանկանում էր, որ մենամարտն ավելի շուտ ավարտվի, ավարտվի նոկաուտով, սակայն դա տեղի չունեցավ: Սա սպորտ է, իսկ պրոֆեսիոնալ սպորտում նման բաներ պատահում են: Ես եղել եմ նման իրավիճակում, երբ բժիշկը դադարեցրել է մարտը՝ չթողնելով շարունակել պայքարը: Իրոք, մտնում եմ Չարի դրության մեջ. նա ցանկանում էր շարունակել: Ես նույնպես պատրաստ էի շարունակել մարտը, սակայն կան կանոններ, որոնք մենք պարտավոր ենք պահպանել:
Այդքան էլ ճիշտ չէ, որ այս դեպքն ուղիղ համեմատական է իմ և Լյուիսի մենամարտի հետ: Դժվար է ասել, թե Չարը միավորներով առաջատար էր, սակայն այն դեպքում այդպես էր: Ուզում եմ նաև ի հավելումն նշել, որ ընդհանրապես նշանակություն չունի, թե բժիշկը որ անկյունում է անցկացնում իր հետազոտությունը: Նա կարող էր դա անել թեˊ կարմիր, թեˊ կապույտ անկյունում:
Բոլորն են ուզում մենամարտել Կլիչկոյի հետ: Կարելի է միայն պատկերացնել, թե ինչ մակարդակի ու որակների մարտիկներ են ցանկանում մենամարտել ինձ հետ: Չաˊր, դու հնարավորություն ունեիր, ինձ հետ մենամարտելով, խլել չեմպիոնական գոտին: Ես համոզված եմ, որ դու դեռ երկար ճանապարհ ունես անցնելու. սա առաջին դեպքը չէ, որ դու հնարավորություն կունենաս բարձր տիտղոսներ նվաճելու: Իսկ այսօրվա մենամարտը ավարտվեց. դու պարտվեցիր»,- Чемпионат.com-ի փոխանցմամբ՝ ասել է Կլիչկոն:
