Նախօրեին «Բարգավաճ Հայաստանի» մամլո խոսնակը բացեիբաց հայտարարել էր, որ վարչապետ Տիգրան Սարգսյանը մամուլի միջոցով վարկաբեկում է Գագիկ Ծառուկյանին: Սա, ըստ էության, աննախադեպ հայտարարություն է, որովհետև մինչ այս երբեք չէր եղել նման ուղղակի մեղադրանք ԲՀԿ կողմից: Այսինքն՝ սրանով, ըստ էության, «Բարգավաճ Հայաստանը» պատերազմ է հայտարարում Տիգրան Սարգսյանին: Սակայն Տիգրան Սարգսյանը չի ընդունում պատերազմի այդ հայտարարությունը:
Համենայնդեպս, դատելով նրա մամուլի քարտուղարի տարածած հայտարարությունից, որում ասվում է, որ երիտասարդ Ուրիխանյանի հայտարարությունները մեկնաբանելու իմաստ չկա, կարող ենք ասել, որ Տիգրան Սարգսյանը հրաժարվում է Գագիկ Ծառուկյանի նետած ձեռնոցից: Երևի թե կասկած չկա նաև, որ Տիգրան Սարգսյանը այդ ձեռնոցից հրաժարվում է իրավիճակը Սերժ Սարգսյանի հետ ճշտելուց հետո: Չի բացառվում նաև, որ վարչապետ Սարգսյանը Գագիկ Ծառուկյանի հետ դիմակայությունից խուսափում է այն նկատառումով, որ Ծառուկյանի համարձակության աղբյուրը Սերժ Սարգսյանն է: Միգուցե Տիգրան Սարգսյանը հրաժարվում է պայքարից այն նկատառումով, որ Սերժ Սարգսյանն է Գագիկ Ծառուկյանին թևեր տվել և ոգեշնչել վարչապետի դեմ, Ծառուկյանի հետ հերթական քաղաքական գործարքը կնքելով և համաձայնության գալով, ինչպես Գյումրիի պարագայում:
Չի բացառվում, որ Տիգրան Սարգսյանը պարզապես զգացել է, որ Սերժ Սարգսյանի պլանների մեջ դիտարկվում է նաև իրեն զոհելու տարբերակը, և այդ պարագայում գերադասել է ավելորդ հակադրությամբ ու պատերազմով չբարդացնել իրավիճակը և շարունակել նույն ռեժիմով, իսկ Ծառուկյանն ինչ ուզում է և ինչքան ուզում է թող պատերազմ հրահրի:
Համենայնդեպս, ակնհայտ է, որ Հայաստանի ներիշխանական և ներքաղաքական պայքարը կամաց-կամաց արթնանում է նիրհից և սկսում են ծավալվել իրադարձություններ, որոնք խոստանում են բավականին հետաքրքիր հեռանկարներ: Ըստ էության կարելի է ասել, որ այս ամենը նաև վկայում է վարչապետի պաշտոնի համար, այսպես ասած, որսի հերթական սեզոնի բացման մասին: Իսկ այն, որ այդ պաշտոնի հավակնորդների պակաս Հայաստանում երբեք չի զգացվել, երևի թե հանրահայտ ճշմարտություն է, որը խոստանում է բավական թեժ որսաշրջան: