Սիրիայի և ԱՄՆ-ի դեմ ԱՄՆ-ի միակողմանի պատժամիջոցները նպատակ ունեն ուղղակիորեն հարվածել ռուսական բիզնեսի շահերին: Այս մասին ինչպես հաղորդում է RIA Novosti-ն, լրագրողներին հայտնել է Ռուսաստանի արտգործնախարար Սերգեյ Լավրովը ԱՄՆ պետքարտուղար Հիլարի Քլինթոնի հետ ունեցած բանակցություններից հետո:
«Ամերիկյան միակողմանի պատժամիջոցները Սիրիայի և Իրանի նկատմամբ գնալով ավելի շատ էքստերիտորիալ բնույթ են ստանում՝ ուղղակիորեն շոշափելով ռուսական բիզնեսի, մասնավորապես բանկերի շահերը»,- ասել է նախարարը:
Նրա խոսքերով՝ բանակցությունների ընթացքում Ռուսաստանը բավական հստակ արտահայտվել է, որ նման մոտեցումն անթույլատրելի է: «Մեզ լսեցին, բայց ես չգիտեմ՝ ինչպիսի կլինի արդյունքը»,- ասել է նախարարը:
Նա նշել է, որ Ռուսաստանը և ԱՄՆ-ը ձգտում են, որպեսզի Սիրիան լինի ազատ, ժողովրդավար, բարգավաճող երկիր, որպեսզի այն ղեկավարի ժողովրդի կողմից ընտրված կառավարություն: Բացի այդ, Լավրովը հավանություն է տվել Սիրիայի ազգային կոմիտեի նախաձեռնությանը՝ Սիրիայի մայրաքաղաքում հրավիրել ընդդիմադիր ուժերի կոնֆերանս:
«Ինչ վերաբերում է Իրանին, ապա և՛ մեզ, և՛ Միացյալ Նահանգների համար միանգամայն անընդունելի է միջուկային զենքի տարածման ռեժիմի խախտումը, և մենք ամեն ինչ կանենք՝ դու թույլ չտալու համար, և դա պետք է չափանիշ լինի մեր բոլոր գործողությունների համար»,- ասել է Լավրովը:
Ինչ վերաբերում է այդ նպատակներին հասնելու մեթոդներին, ապա Լավրովի խոսքերով՝ ԱՄՆ-ը նախընտրում է սպառնալ և ավելացնել ճնշումը, նոր պատժամիջոցներ սահմանել ինչպես Սիրիայի, այնպես էլ Իրանի դեմ: Մինչդեռ Մոսկվան համաձայն չէ այդ սկզբունքի հետ, քանի որ «խնդրի լուծման համար անհրաժեշտ է ներգրավել, ոչ թե մեկուսացնել այդ երկրներին»,- ասել է նախարարը: