Ռուսաստանի արտգործնախարար Սերգեյ Լավրովը ԱՄՆ պետքարտուղար Հիլարի Քլինթոնի հետ Վլադիվոստոկում կայացած հանդիպմանը չի քննարկել «Մագնիտսկու ցուցակի» բովանդակությունը, քանի որ Մոսկվային այդ թեման չի հետաքրքրում: Այս մասին հաղորդում է «Վզգլյադ» թերթը:
«Մենք չենք պատրաստվում հետաքրքրվել ինչ-որ ցուցակների բովանդակությամբ, որոնք որևէ կապ չունեն Ռուսաստանի Դաշնության վարած աղմկոտ դատական գործընթացի և հետաքննության իրական խնդիրների հետ»,- ասել է Լավրովը լրագրողներին՝ հավելելով, որ այդ թեման չի քննարկվել:
Լավրովը նշել է, որ ինքը Քլինթոնի ուշադրությունն է հրավիրել ԱՄՆ-ում պահվող Վիկտոր Բուտի և Կոնստանտին Յարոշենկոյի բանտային պայմանների վերաբերյալ Ռուսաստանի հավակնությունների վրա: Նա նշել է, որ իրենք պատրաստվում են փաստաթղթեր ներկայացնել Վաշինգտոնին՝ նրանց արտահանձնմանը հասնելու համար:
Ընդհանուր առմամբ Լավրովը նշել է, որ գոհ է ԱՄՆ-ի իր գործընկերոջ հետ հանդիպումից:
Նրա խոսքերով՝ Մոսկվայում հասկանում են, որ ամերիկյան վարչակազմի անդամները այժմ առաջին հերթին զբաղված են նախընտրական հարցերով, սակայն իրենք նկատել են ամերիկացի գործընկերների տրամադրվածությունը՝ տարբեր ոլորտներում փոխհամագործակցությունն ընդլայնելու կոնկրետ քայլերի շարունակման ուղղությամբ:
«Մենք հատուկ ուշադրություն ենք դարձրել առևտրատնտեսական կապերի վրա՝ հաշվի առնելով այն, որ Լոս-Կաբոսում Ռուսաստանի և ԱՄՆ-ի նախագահներ Պուտինը և Օբաման համաձայնության էին եկել այդ ոլորտում, առաջին հերթին ներդրումների բնագավառում համագործակցությունն ավելացնելու շուրջ»,- ասել է Լավրովը:
Նա նշել է, որ իրենք համաձայնության են եկել ստեղծել մի մեխանիզմ, որը հնարավորություն կտա հետևել գործարար կլիմային երկու երկրներում այն իրավիճակների համար, երբ Ռուսաստանում ԱՄՆ ընկերությունները կամ ԱՄՆ-ում Ռուսաստանի ընկերությունները բախվեն որևէ բյուրոկրատական կամ այլ խոչընդոտների:
«Անկասկած, մենք լռությամբ չենք շրջանցել մեր հարաբերություններում պահպանվող խնդիրները: Մենք հաստատել ենք մեր դիրքորոշումը այն քննարկումներում, որոնք տարվում են Կոնգրեսում, և որոնք նպատակ ունեն Ջեքսոն Վիննիկի չեղյալ համարումը փաթաթել անընդունելի խոչընդոտներով»,- ասել է Լավրովը:
