Ֆրանսահայ ընկերակցութիւնները համակարգող խորհուրդին՝ CCAF-ի նախաձեռնութեամբ, Սեպտեմբեր 6ի երեկոյեան՝ բողոքի ցոյց մը տեղի ունեցաւ Փարիզի հունգարական դեսպանատան առջև՝ ավընիւ Ֆոշ: Հետզհետէ խտացող և մեծ մասամբ երիտասարդներէ բաղկացած բազմութիւնը հասաւ մինչև 500 հոգիի:
Խօսնակի պաշտօնը ստանձնած էր Հայ Դատի Փարիզի գրասենեակէն՝ Դանիա Պապանազարեան, որ բացատրեց, թէ հետապնդուած նպատակն է՝ ձեռք ձգել մարդասպան Սաֆարովին բանտ վերադառնալը և պատիժը կրելը՝ մինչև վերջ:
Ապա, CCAF-ի համանախագահներ՝ Մ. Փափազեան և Ա. Թորանեան, այդ պահանջը բովանդակող բողոքագիր մը յանձնելու համար՝ ոստիկանութեան կողմէ արտօնուեցան մուտք գործելու դեսպանատան բակէն ներս: Սակայն անոնք շուտով վերադարձան՝ ըսելով, որ ընդունուած էին դեսպանատան պատասխանատուներէն մէկուն կողմէ՝ դրան առջև միայն, ու անոր յանձնած էին նամակը:
Ժողովուրդը կը բացագանչէր՝ «Մարդասպանը ազատագրուած է, արդարադատութիւնը՝ ոտնակոխուած», կամ՝ «Բանտարկութի՛ւն՝ Սաֆարովին», ու կը բարձրացնէր Սաֆարովի ազատ արձակումը և փառաբանումը դատապարտող ցուցատախտակներ:
Յաջորդաբար խօսք առին Մ. Փափազեան, եվրոպական երեսփոխան՝ Միշէլ Ռիվազի, Ա. Թորանեան և CCAF-ի ընդհ. նախագահ Ա. Կէօվճեան, բոլորն ալ դատապարտելով Հունգարիոյ և Ազէրպայճանի կեցուածքը: Ռիվազի յայտնեց, որ եվրոպական խորհրդարանը մօտ օրէն՝ Սաֆարովի ազատ արձակումը դատապարտող բանաձև մը պիտի պատրաստէ: Յայտարարուեցաւ նաև Ալիևի Ֆրանսա մօտալուտ այցելութեան լուրը և հնչեցին այդ առընչութեամբ՝ ֆրանսական իշխանութիւնները ազդարարող արտայայտութիւններ: